निर्वाचन आयोगले चितवनका निर्वाचन अधिकृत परिवर्तन गरेको विषयमा विभिन्न टिकाटिप्पणी हुँदा न्यायाधीश हेमन्त रावलले प्रस्टीकरण दिँदै निर्वाचन निष्पक्षतामा शंका नगर्न आग्रह गरेका छन् ।
भरतपुर महानगरपालिकाका मुख्य निर्वाचन अधिकृत जिल्ला न्यायाधीश हेमन्त रावलको सट्टा अर्का न्यायाधीश प्रकाशकुमार अधिकारीलाई प्रमुख निर्वाचन अधिकृत तोकिएको विषयमा विभिन्न टिकाटिप्पणी भएपछि रावलले प्रस्टीकरण दिएका हुन् ।
गत २६ चैत देखि रिंगटा लाग्ने र बान्ता हुने समस्याले दुई दिनको अस्पताल बसाईपछि हाल घरमा आराम गरिरहेको उनले जनाएका छन् । अझै बेडरेष्ट गर्नुपर्ने भएकाले जिम्मेवारी लिन असमर्थ भएको उनको भनाइ छ ।
‘स्वास्थ्य अवस्थामा तत्काल पूर्ण सुधार आइनसकेको अवस्थामा थप केही दिन घरमै आराम गर्नु पर्ने भन्ने चिकित्सकको सल्लाह बमोजिम म अहिले घरमै आराम गरिरहेको छु,’ रावलको प्रस्टीकरणमा भनिएको छ, ‘मेरो यो असहज अवस्थामा मैले निर्वाचन आयोगमा गरेको अनुरोध बमोजिम नै आयोगबाट हिजो चितवनको मुख्य निर्वाचन अधिकृतको जिम्मेवारी हेरफेर गरी न्याय परिषद्बाट पहिले नै सिफारिस गरिएका न्यायाधीशको सुचीमा रहेका चितवन जिल्ला अदालतका अर्का सहकर्मी माननीय न्यायाधीश नै मुख्य निर्वाचन अधिकृतको जिम्मेवारीमा तोकिएको अवस्था हो ।’
उनले निर्वाचनको निष्पक्षतामाथि आशंका नगर्न पनि आग्रह गरेका छन् । ‘मेरो शारीरिक अस्वस्थताको कारण उत्पन्न हुन गएको यो परिस्थितिलाई सोही रूपमा बुझिदिनु हुन र निर्वाचनको निष्पक्षतामा असर पर्ने गरी आयोग र अन्य कुनै राजनीतिक दलप्रति कुनै किसिमको टिकाटिप्पणी नगरि दिनु हुन म सबैमा हार्दिक अनुरोध गर्दछु’ रावलको अपिल छ ।
रावल चितवन जिल्ला अदालतका मुख्य न्यायाधीश हुन् । अधिकारी चितवन जिल्ला अदालतमा चौथो नम्बरका न्यायाधीश हुन् । उनीभन्दा अगाडि केशवप्रसाद अधिकारी र गायत्रीप्रसाद रेग्मी जिल्ला न्यायाधीश छन् । निर्वाचन आयोगले सोमबार एक सूचना जारी गर्दै भरतपुर महानगरको मुख्य निर्वाचन अधिकृत रावलको ठाउँमा अधिकारीलाई तोकिएको जनाएको छ ।
आयोगले भने मुख्य निर्वाचत अधिकृत हेरफेरलाई सामान्य भनेको छ । यसअघि पनि ७१ जना मुख्य निर्वाचनहरू हेरफेर गरिएका थिए । भरतपुर महानगरपालिका भने चर्चामा रहेकोले मुख्य निर्वाचन अधिकृत हेरफेरप्रति चासो राखिएको छ ।
यसअघि भरतपुरमा मतपत्र च्यातिने प्रकरणमा मुख्य निर्वाचन अधिकृत कविप्रसाद न्यौपानेले सहयोगी भूमिका खेलेको भन्दै एमालेले न्यायपरिषदमा कारबाहीका लागि उजुरीसमेत दिएको थियो ।
