बलात्कारको आरोपमा दोलखाका विनोद गुरुङ पक्राउ परेका छन् । प्रहरी वृत्त गौशालाले उनलाई बुधबार पक्राउ गरेको हो ।
जोरपाटीबाट एक महिलालाई ललाइफकाई गरी अपहरण शैलीमा चाबहिलको एक होटेलमा राखी रेड्बुलमा बेहोस हुने विषादी खुवाएर बलात्कार गरेको पीडित युवतीको भनाइ छ । उनलाई साँगा भन्ज्याङ चोकको आसपास अरनिको हाइवे किनारमा झाडीमा फालेको अवस्थाबाट आफन्त र प्रहरीले उद्धार गरेका थिए ।
नेकपा एमाले शैलुङ गाउँ कमिटीको अध्यक्ष थिरबहादुर मोक्तान, पूर्वमन्त्रि पार्वत गुरुङ र उनको दाजु हिमाल गुरुङ त्रिपुरेश्वरको एउटा होटेलमा केस मिलाउने भन्दै भेला भएको स्रोतको दाबी छ ।
तर पूर्वमन्त्री गुरुङले भने यसबारेमा अनभिज्ञता व्यक्त गरे । केटिएम दैनिकसँगको टेलिफोनमा सम्पर्कमा उनले आफू भर्खरै जिल्लाबाट आएकोले यस विषयमा जानकार नभएको बताए । तर पीडित पक्ष भने आफूलाई मेलमिलाप गर्न भन्दै मन्त्री गुरुङले नै बोलाएको दाबी गर्छन् ।
पीडित पक्षले प्रहरीलाई जानकारी गराएपछि बलात्कारको आरोपमा विनोद गुरुङ पक्राउ परेका हुन् । पीडित महिलालाई चाबहिलको एक होटेलमा बलात्कार गरेर झाडीमा फ्याँकेर आरोपित हिँडेका थिए ।
उनलाई होटेलबाटै प्रहरीले नियन्त्रणमा लिएको प्रहरी स्रोतले जानकारी दियो । यो समाचार पुष्टि गर्ने क्रममा केटिएम दैनिकले पीडित महिलाका बुबालाई पनि सम्पर्क गरेको थियो । उनका अनुसार छोरीलाई ललाइफकाई होटेल पुर्याएर बलात्कार गरिएको हो । उनको अवस्था अहिले सामान्य रहेको छ ।
उनलाई छुटाउनको लागि पूर्वमन्त्री पार्वत गुरुङ, पीडकका आफन्त हिमाल गुरुङ लागिरहेको आरोप पीडित परिवारले लगाइरहेका छन् ।