सर्वसाधारणले गरिरहेको प्रदर्शनको भिडियो खिचेको भन्दै मोरङ प्रहरीले एक जना पत्रकार, दुई जना युटुबरसहित ११ जनालाई पक्राउ गरेको छ ।
मोरङ सुन्दर हरैंचा ७ की डेढ वर्षीया नाबालिकाको बलात्कारपछि हत्या भएको विरोधमा स्थानीयबासीले राजमार्ग चक्काजाम गरेका थिए । त्यहीक्रममा भिडिओ खिच्ने पत्रकार सम्झना राई र अन्य दुई जना युटुबरसहितका गाउँलेलाई प्रहरीले मंगलबार साँझ गछियाबाट पक्रेर रातभर हिरासतमा थुनेको हो । पत्रकार राई पूर्वी कमाण्ड अनलाइनकी पत्रकार हुन् ।
सर्वसाधारणले प्रदर्शन गरिरहेको ठाउँमा भिडियो खिच्दा उनीहरुलाई प्रहरीले नियन्त्रणमा लिएको हो । उनीहरुलाई रातभर प्रहरी हिरासतमा राखेको गाउँलेले बताएका छन् ।
मोरङ प्रहरी प्रवक्ता डिएसपी मन्जिल मुकारुङले ११ जना पक्राउ परेको भन्दै उनीहरु सबैको पहिचान भइनसकेको केटिएम दैनिकलाई बताए । प्रहरीले उनीहरुलाई अभद्र व्यवहारको मुद्दा चलाउने तयारी गरेको छ ।