मधेस प्रदेशमै ठुलो दुग्ध उद्योग सर्लाहीको हरिवनमा सञ्चालनमा आएको छ ।
सर्लाहीको हरिवन नगरपालिका–९, नयाँ रोडमा शुक्रवार उक्त डेरीको एक समारोहकाबीच उद्घाटन गरिएको हो । मंगलम डेरी एण्ड फुड ईन्डस्ट्रीजको रूपमा सञ्चालनमा आएको उद्योगको स्थानीय वयोवृद्ध बबरजंग थापाले उद्घाटन गरेका उद्योग सञ्चालक राघो प्रसाद सिंहले जानकारी दिए ।
उद्योग सञ्चालक सिंहका अनुसार यस उद्योग १० करोड लागतमा तयार गरिएको हो । यस उद्योगले अत्याधुनिक प्रविधिको प्रयोगबाट गुणस्तिरीय दुग्ध पदार्थ उत्पादन गर्ने उनको भनाइ छ । दैनिक १६ हजार लिटर सम्म दूधका परिकार तयार गर्न सक्ने उद्योगको क्षमता रहेको उद्योग सञ्चालकको दाबी छ ।
यस उद्योगबाट छुर्पी, पोका दूध, दही, घ्यु, पनिर, नौनी, खुवा, आइसक्रिम, कुल्फी, मिठाई, चकलेट लगायतका परिकार उत्पादन गर्ने योजना रहेको छ । उद्योगबाट उत्पादन भएका पदार्थ सर्लाही सहित रौतहट, बारा, पर्सा, महोत्तरी र धनुषा सम्मका बजारमा पुर्याइने उद्योगका प्रबन्ध निर्देशक सबल सिंहले बताए ।
स्थानीय स्तरमा उत्पादन भएका दूध सङ्कलन गरेर प्रयोग गरिने उद्योगले जनाएको छ । स्थानीय स्तरमा यती ठुलो उद्योग सञ्चालनमा आएको भन्दै दूध उत्पादक किसानमा समेत खुसी छाएको छ । प्रत्यक्ष ३० जना कर्मचारी रहने उद्योगबाट यस क्षेत्रका १ सय ५० बढी नागरिकले रोजगारी पाउने छन् ।
उद्योग स्थापनामा स्विस कन्ट्याक्ट परियोजनाको समेत प्राविधिक सहयोग रहेको उद्योगका संस्थापक सिंहले जानकारी दिए ।
