सुदूरपश्चिम प्रदेशमा कोरोना सङ्क्रमण दर घट्न थालेको छ । पछिल्लो एक सातायता सुदूरपश्चिममा कोरोना सङ्क्रमण दर घटेको स्वास्थ्य निर्देशनालयको तथ्याङ्कले देखाएको छ । तथ्याङ्कमा सङ्क्रमण दर घटेको देखिए पनि स्वास्थ्यकर्मी भने पछिल्लो समय कोरोनाको जोखिम झनै उच्च रहेको बताउँछन् ।
‘अहिले घरघरमै कोरोना जस्तै लक्षण भएका बिरामी देखिन्छन्,’ सुदूरपश्चिम प्रदेशका स्वास्थ्य निर्देशक डा. जगदिश जोशीले भने, ‘अस्पतालमा परीक्षण गराउन आउनेको सङ्ख्या न्यून छ, जसका कारण सङ्क्रमण दर केही घटेको देखिए पनि जोखिम उच्च छ ।सबैले सावधानी अपनाउनु पर्दछ ।’
भारतबाट आउने नागरिकको सीमामा स्वास्थ्य परीक्षण गर्दा सङ्क्रमण दर उस्तै रहेको भए पनि समुदाय स्तरबाट कोरोना परीक्षण गराउने दर घटेका कारण कोरोना सङ्क्रमण दर घटेको जस्तो देखिएको निर्देशक जोशीले बताए । तर, कोरोना परीक्षण गराउन अस्पताल आउनेमध्ये ६० प्रतिशत बढीमा सङ्क्रमण पुष्टि हुने गरेको उनले बताए ।
‘अस्पतालसम्म पुग्नेमध्ये ६० प्रतिशत बढीमा कोरोना सङ्क्रमण पुष्टि हुने गरेको छ,’ निर्देशक जोशीले भने, ‘यसले यसले पनि कोरोनाको जोखिम उच्च छ भन्ने देखाउँछ, तथ्याङ्कमा सङ्क्रमण घटेको देखेर खुसी हुनुपर्ने अवस्था छैन ।’
उनले भारतमा कोरोनाको जोखिम अझै पनि उच्च भएका कारण सुदूरपश्चिममा कोरोनाको जोखिम कम छ भन्ने नमिल्ने बताए । ‘भारतमा सङ्क्रमण दर धेरै छ,’ प्रदेश स्वास्थ्य निर्देशक जोशीले भने, ‘त्यसको प्रत्यक्ष असर सुदूरपश्चिममा हुने गर्दछ, त्यसैले हामी देशका अन्य प्रदेशभन्दा बढी जोखिममा छौँ ।’
पछिल्लो समय घरघरमै कोरोनाकै जस्तो लक्षण देखिएका बिरामी रहे पनि परीक्षण गराउन अस्पतालसम्म नआउने गरेको भन्दै त्यसले जोखिम अझै बढाउन सक्ने निर्देशक जोशी बताउँछन् । कोरोनाको जस्तो लक्षण देखिएमा सबैलाई स्वास्थ्य संस्थामा गएर अनिवार्य स्वास्थ्य परीक्षण गराउनसमेत उनले आग्रह गरेका छन् ।
स्वास्थ्य निर्देशनालय डोटीले पछिल्लो एक साताको अवधिमा सार्वजनिक गरेको कोरोना सङ्क्रमण दरको तथ्यांकअनुसार ११ माघमा सुदूरपश्चिममा सबैभन्दा बढी ६५२ जनामा सङ्क्रमण देखिएको थियो । त्यसपछि भने सङ्क्रमण दर निरन्तर घट्दो क्रममा छ । ११ माघमा एक हजार ९७३ जनाको स्वास्थ्य परीक्षण गर्दा ६५२ जनामा सङ्क्रमण देखिएको थियो । १२ माघमा एक हजार ८ ५० जनाको स्वाब परीक्षण गर्दा ६१४ जनामा कोरोना सङ्क्रमण पुष्टि भएको थियो ।
स्वास्थ्य निर्देशनालयका अनुसार १३ माघमा एक हजार ९१३ जनाको स्वास्थ्य परीक्षण गर्दा ५५८ जना र १४ माघमा ४८६ जनामा कोरोना सङ्क्रमण पुष्टि हुँदा १५ माघमा २६९ जनामा कोरोना सङ्क्रमण पुष्टि भएका निर्देशनालयको तथ्याङ्कमा उल्लेख छ ।
यसै गरी १६ माघमा ३३६ जनामा कोरोना सङ्क्रमण पुष्टि हुँदा सोमबार भने पुनः सङ्क्रमण दर बढेर ४१३ जनामा सङ्क्रमण पुष्टि भएको छ । सोमबार प्रदेशका एक हजार ४४८ जनाको स्वास्थ्य परीक्षण गर्दा ४१३ जनामा सङ्क्रमण पुष्टि भएको निर्देशनालयले जनाएको छ ।
सुदूरपश्चिममा एक साताको अवधिमा तीन जनाको कोरोना सङ्क्रमणका कारण मृत्यु भएको छ । स्वास्थ्य निर्देशनालयका अनुसार १३ माघमा कैलालीका एक जनाको र १४ माघमा कैलाली तथा कञ्चनपुरका एक एक जनाको कोरोना सङ्क्रमणका कारण मृत्यु भएको हो ।
योसँगै सुदूरपश्चिममा कोरोना सङ्क्रमणका कारण मृत्यु हुनेको सङ्ख्या ६२३ रहेको छ । सोमबारसम्म सुदूरपश्चिममा ५७ हजार ८१५ जनामा कोरोना सङ्क्रमण पुष्टि भएकोमा ५३ हजार ६९ जना कोरोना सङ्क्रमण मुक्त भएका छन् ।
सोमबारसम्म सुदूरपश्चिममा चार हजार ६९८ जनामा कोरोनाको सक्रिय सङ्क्रमण रहेको स्वास्थ्य निर्देशनालयले जनाएको छ । निर्देशनालयका अनुसार सोमबारसम्म कैलालीका सबैभन्दा बढी दुई हजार ५०२ जनामा कोरोनाको सक्रिय सङ्क्रमित छन् । यसै गरी कञ्चनपुरका एक हजार ८२ जनामा सक्रिय सङ्क्रमित छन् ।
निर्देशनालयका अनुसार डोटीमा २७९, दार्चुलामा ८६, डडेल्धुराका २४८, बाजुरामा २३१, बझाङमा १४१, बैतडीमा २०२ र अछाममा १३१ जना सक्रिय सङ्क्रमित छन् ।
