१३ वर्षीया नाबालिकालाई जबरजस्ती करणी गरी गर्भवती बनाउने एक जनालाई प्रहरीले पक्राउ गरेको छ ।
पक्राउ पर्नेमा बर्दियाको ठाकुरबाबा नगरपालिका–६ का ४१ वर्षीय मनिराम थारु छन् । उनले स्थानीय एक १३ वर्षीया नाबालिकालाई बलात्कार गरी गर्भवती बनाएको भन्दै प्रहरीले पक्राउ गरेको हो ।
उनले नाबालिका आफ्नो घरमा एक्लै भएको अवस्थामा डरत्रास देखाई घरभित्रै गत वैशाख २७ गते करणी गरेको प्रहरीले जनाएको छ । घटनाबारे कोही कसैलाई भनेमा मारेर फालिदिने धम्की थारुले नाबालिकालाई दिएको प्रहरीको भनाइ छ ।
आइतबार बालिकालाई एक्कासी पेट दुखेपछि अस्पताल लगेर उपचार गराउने क्रममा बालिका गर्भवती रहेको खुलेको थियो । सोही दिन पीडित बालिकाको गर्भबाट छोरीको जन्म समेत भएको सूचना पाएलगत्तै प्रहरीले मनिराम थारुलाई पक्राउ गरेको हो ।
थारुलाई जबरजस्ती करणीसम्बन्धी कसुरमा बर्दिया जिल्ला अदालत गुलरियाबाट म्याद थप गरी थप अनुसन्धान कार्य भइरहेको प्रहरीको भनाइ छ भने नाबालिकासहित उनले जन्माएको बच्चालाई सेवा केन्द्रमा राखिएको छ ।