नेपालमा अहिले कोरोना भाइरसको तेस्रो लहर कायम छ । २५ पुषमा ४ अङ्क (१ हजार १६७) जनामा सङ्क्रमण पुष्टि भएपछि सेलाएको कोरोना फेरी फैलिन थालेको पुष्टि भयो ।
हुन त दक्षिण अफ्रिकामा कोरोनाको नयाँ भेरियन्ट पुष्टि भएको १२ दिनपछि अर्थात् मङ्सिर २० मा नेपालमा पनि पुष्टि भएपछि तेस्रो लहरको सङ्क्रमण जोखिम देखिन थालेको थियो ।
माघ ६ गते १२ हजार ३३८ जनामा सङ्क्रमण देखियो । नेपालमा कोरोना भाइरसको सङ्क्रमण देखिएयता एकैदिनमा पुष्टि भएको यो सङ्ख्या अहिलेसम्मकै सर्वाधिक हो ।
हामीले माघ १ देखि माघ १५ गतेसम्मको कोरोनाको तथ्याङ्क विश्लेषण गर्दा यो अवधिमा ९० जनाको ज्यान गएको पाइएको छ । माघ ८, १३ र १४ गते बाहेक अन्य दिनहरूमा कोरोनाबाट ज्यान गुमाउनेको सङ्ख्या सिङ्गल डिजिटमा रहेको छ । माघ ८ गते १६ जना, १३ गते १५ जना र १४ गते १० जनाले ज्यान गुमाएका हुन् ।
पहिलो र दोस्रो लहरको सङ्क्रमणको बेला धेरैजनाले ज्यान गुमाए पनि तेस्रो लहरमा कोरोनाबाट हुने मृत्युदर निकै कम छ । यो अवधिमा एक लाख २८ हजार २३१ जनामा सङ्क्रमण पुष्टि हुँदा ज्यान गुमाउनेको सङ्ख्या दुई अङ्क (९९ भन्दा कम) मा सीमित छ ।
अघिल्लो चरणमा सङ्क्रमित भएका धेरै व्यक्तिहरूलाई अस्पताल भर्ना हुनुपर्ने र अक्सिजनको आवश्यकता परेको भएता पनि यो चरणमा भने धेरैले होम आइसोलेसनमै बसेर सङ्क्रमणलाई परास्त गर्न सफल भए । १५ दिनको अवधिमा ३२ हजार ७०६ जनाले यो भाइरसलाई परास्त गरेका छन् ।
पछिल्ला दिनहरूमा सङ्क्रमणमुक्त हुनेहरूको सङ्ख्या उच्च छ । आज (शनिवार) थप भएका सङ्क्रमित भन्दा निको हुनेको सङ्ख्या उच्च रहेको छ । तेस्रो लहरको सङ्क्रमण देखिएयता नयाँ पुष्टि हुनेभन्दा निको हुनेको सङ्ख्या बढी हो ।
तीव्र रूपमा सङ्क्रमण फैलिएको भएता पनि मृत्युदर र अस्पताल भर्ना हुनेको दर कम रहेकाले यो भेरियन्टले त्यति ठुलो मानवीय क्षति भने गर्न पाएको छैन ।