नेपाली कांग्रेसका नेताहरूको वरियता क्रम तोकिएको छ।
शनिबार सभापति देउवाले नेताहरुको वरियता क्रम तोकेका हुन् । वरियता क्रम अनुसार दोस्रो नम्बरमा रामचन्द्र पौडेल छन् । यस्तै तेस्रोमा कृष्ण सिटौला परेका छन् । त्यसपछिको वरियताक्रममा भने पदाधिकारी रहेका छन् ।
विधानअनुसार सभापतिलाई वरियता तोक्ने अधिकार दिइएको छ। कांग्रेसमा सभापतिसहित १३ जना पदाधिकारी रहन्छन् । नेताहरु पौडेल र सिटौंला समेत गर्दा शिर्ष १५ नेताको बरियता तोकिएको छ ।
एक केन्द्रीय सदस्यकाअनुसार त्यसपछि पूर्व महामन्त्री डा शशांक कोइराला, पूर्व कोषाध्यक्ष चित्रलेखा यादव, पूर्वसहमहामन्त्रीहरु अर्जुन नरसिंह केसी, डा. रामशरण महत र सुनिलबहादुर थापालाई राखिएको छ । उनीहरूपछि अन्य दुई नेतालाई राखेर मात्र डा कोइरालालाई राखिएको छ ।
१३ औं महाधिवेशनपछि पौडेल दोस्रो वरियतामै थिए। १४औं महाधिवेशनमा उनी मतदान नगरी बसेका थिए। सिटौला भने महाधिवेशनमा देउवासँग मिलेका थिए। देउवासँग कोइराला सभापतिमा पराजित भएका थिए। सभापतिमा पराजित हुने तर धेरै मत ल्याउने उम्मेदवार स्वत: केन्द्रीय सदस्य हुने प्रावधान छ।
कांग्रेसमा सभापतिमा पराजित नेतालाई दोस्रो बरियतामा राख्ने प्रचलन थियो । १२ औँ महाधिवेशनमा पराजित देउवा दोस्रो बरियतामा थिए भने १३ औँ महाधिवेशनमा पराजित पौडेललाई दोस्रो बरियतामा राखिएको थियो । कोइराला १४औँ महाधिवेशनमा सभापतिका उम्मेदवार शेरबहादुर देउवासँग दोस्रो चरणको चुनावमा पराजित भएका थिए ।
वरियतामा धेरै पछाडि राख्ने थाहा पाएपछि कोइराला शनिबारको केन्द्रीय समिति बैठकमा गएनन्। वरियतामा असन्तुष्ट रहेका कोइरालाले आफ्नो धारणा सार्वजनिक गरेका छैनन्।
१३औं महाधिवेशनमा कोइराला वरियतामा ३५ नम्बरमा थिए।
