नेपाली कांग्रेसका प्रभावशाली नेता डा. शेखर कोइराला एक सातायता विराटनगरमा छन्। उनी विभिन्न कार्यक्रमहरूमा सहभागी हुने, कार्यकर्ताहरूसँग भेटघाट गर्ने गरिरहेका छन्।
कोइराला चिकित्सक पनि हुन्। र, उनको गृहजिल्ला मोरङ हो। गएको मंसिरमा भएको नेपाली कांग्रेसको चौधौं महाधिवेशनमा कांग्रेस सभापतिका प्रत्याशी रहेका कोइरालाले त्यसपछि पार्टीमा आफ्नो प्रभाव निकै बढाएका छन् ।
यसक्रममा कोइराला बुधबार आफ्नो चुनाव क्षेत्र मोरङ क्षेत्र नम्बर ६ मा पुगेका थिए। मोरङ क्षेत्र नम्बर ६ अन्तर्गतको विराटचोकमा कोइरालाले मतदाता, कार्यकर्ता मात्रै भेटेनन्, बृद्धबृद्धाहरूको स्वास्थ्य परीक्षण पनि गरे।
फिजिसियन डाक्टरसमेत रहेका कोइराला आला र ब्लड प्रेसर मनिटर बोकेर आफैं स्वास्थ्य परीक्षणमा सक्रिय भएका थिए। नेपाली कांग्रेस विराटनगर महानगर सभापति दीपक चापागाईंका अनुसार कोइरालाले दुई सय जनाको स्वास्थ्य परीक्षण गरेका थिए।
कोइराला बुधबार काठमाडौं फर्किँदैछन्। कोइराला यसअघि विराटनगरमा बाढी पस्दा यसैगरी आला बोकेर स्वास्थ्य परीक्षणमा गएका थिए।