प्रधानसेनापति प्रभुराम शर्मा भारत भ्रमणमा गएका छन्। भारतीय स्थल सेनाध्यक्षको औपचारिक निमन्त्रणामा शर्मा मंगलबार बिहान नयाँ दिल्ली प्रस्थान गरेका हुन्।
प्रधानसेनापति भएपछि शर्माको यो पहिलो विदेश भ्रमण हो। प्रधानसेनापति शर्मा ९ सदस्यीय सैनिक टोलीको नेतृत्व गर्दै सेनाको जहाजमा भारतको राजधानी नयाँदिल्ली गएका हुन् । त्रिभुवन अन्तर्राष्ट्रिय विमानस्थलमा उनलाई बलाधिकृत रथी बालकृष्ण कार्कीले बिदाई गरेका थिए।
भारत प्रस्थान गर्नुपूर्व प्रधान सेनापति महारथी शर्मालाई सोमबार जंगी अड्डामा सम्मान गारत अर्पण गरिएको थियो । औपचारिक बिदाई कार्यक्रममा नेपालका लागि भारतीय राजदुत महामहिम विनय मोहन क्वात्रा र अन्य मित्र राष्ट्रका सैनिक सहचारीहरुको सहभागिता रहेको नेपाली सेनाले जनाएको छ।
शर्माले भारतमा भारतीय स्थल सेनाध्यक्षको मानार्थ दर्ज्यानी ग्रहण गर्नेछन्। नेपाल र भारतका सेना प्रमुखहरुलाई कदरस्वरुप एकअर्को मुलुकको मानार्थ महारथीको दर्जाबाट सम्मान गर्ने प्रचलन छ। भारतीय राष्ट्रपति रामनाथ कोविन्दले राष्ट्रपति कार्यालयमा कार्तिक २४ गते हुने विशेष समारोहमा प्रधानसेनापति शर्मालाई भारतीय स्थल सेनाको मानार्थ महारथीको दर्ज्यानी चिन्हबाट सम्मान गर्नेछन्।
राष्ट्रपति विद्यादेवी भण्डारीले भारतीय सेनाध्यक्ष मनोज मुकुन्द नरवाणेलाई राष्ट्रपति कार्यालयमा आयोजित विशेष समारोहमा २०७७ कार्तिक २० गते नेपाली सेनाको मानार्थ प्रधानसेनापतिको दर्ज्यानी प्रदान गरेकी थिइन्।
नयाँदिल्ली पुगे लगत्तै भारतीय सैनिकको एक टुकडीले प्रधानसेनापति शर्माको सम्मानमा ‘सम्मान गारत’दिनेछ। भ्रमणको क्रममा प्रधान सेनापति महारथी शर्माले विभिन्न भारतीय उच्चपदस्थ पदाधिकारीहरुसँग भेटघाट गर्ने सैनिक जनसम्पर्क निर्देशनालयले जनाएको छ । उनले मंगलबारै भारतीय रक्षा सचिव अजय कुमार, भारतीय चिफ अफ डिफेन्स स्टाफ जनरल विपिन रावत, भारतीय सेनाध्यक्ष जनरल एम एम नरवणे र भारतीय वायु सेनाध्यक्ष एयर चिफ मार्शल भि आर चौधरीसँग समेत भेटघाट गर्ने कार्यक्रम रहेको छ ।
प्रधान सेनापति महारथी शर्माको भारत भ्रमणको अवधिभर उनको अनुपस्थितीमा बलाधिकृत रथी बालकृष्ण कार्कीले कायममुकायम प्रधानसेनापतिको कार्यभार सम्हाल्ने नेपाली सेनाले जनाएको छ।
कोरोना भाइरस संक्रमणको जोखिमका कारण यो पटक राजधानी दिल्ली बाहिर कुनै पनि कार्यक्रम तय नगरिएको नेपाली सेनाले जनाएको छ। सन् १९५० मा भारतीय सेनाका प्रथम कमाण्डर इन चिफ के एम करिप्पालाई नेपाली सेनाको मानार्थ महारथीको दर्ज्यानी दिइएको थियो। सन् १९५० देखि सुरु भएको यो प्रचलन सन् १९६९ मा एक पटक भंग भएको थियो। त्यसपछि भारतले नाकाबन्दी गरेका बेला पंचायतकालमा दुवै मुलुकका सेना प्रमुखहरुले मानार्थ महारथीको दर्ज्यानी लिएका थिएनन्।
औपचारिक कार्यक्रम पूरा गरी प्रधानसेनापति शर्मा कार्तिक २६ गते शुक्रबार नेपाल फर्कने छन्।
