लामो समयदेखि पूर्वप्रधानमन्त्री माधव कुमार नेपाललाई साथ दिएकाहरूले अन्तिम समयमा आएर नेपालको साथ छाडेका छन् । नेकपा एमाले विभाजन गर्न लाग्दा उनीहरू नेपालको पक्षमा खुलेर लागेका थिए ।
एमाले उपाध्यक्ष भीम रावलले पहिल्यै नै साथ छाडिसकेका छन् । उनलाई पछिल्लो समय अष्टलक्ष्मी शाक्य र युवराज ज्ञवालीले साथ छाडेका छन् ।
उपाध्यक्ष युवराज ज्ञवाली पनि विभाजनको विपक्षमा उभिएका छन् । उनले पनि माधव नेपाललाई साथ दिएनन् । केपी शर्मा ओलीका कटु आलोचक भएपनि उनले एमालेभित्रै रहेर ओलीसँग संघर्ष गर्ने निर्णय लिएका छन् ।
रावल, शाक्य र ज्ञवाली माधव नेपालको खेमाबाट नवौं महाधिवेशनबाट निर्वाचित उपाध्यक्ष हुन् । उनीहरुलाई नेता नेपालका विश्वासपात्र मानिन्थ्यो ।
पार्टी फुटाउन साथ नदिनेमा माधव नेपाल पक्षका गोकर्ण बिष्ट, योगेश भट्टराई र भीम आचार्य पनि हुन् । उनीहरु नवौं महाधिवेशनबाट निर्वाचित सचिव हुन् ।
यसैगरी, माधव नेपाल पक्षबाट नवौं महाधिवेशनबाट महासचिवको उम्मेदवार बनेका सुरेन्द्र पाण्डे अलमलमा छन् ।
