नयाँ सिजनको स्पेनिस ला लिगामा बार्सिलोनाले सुखद सुरुवात गरेको छ । आफ्नो पहिलो खेल खेलेको बार्सिलोनाले आइतबार राति रियल सोसिडाडमाथि ४–२ गोल अन्तरको जित निकालेको हो ।

बार्सिलोनाले आफ्ना पूर्व–कप्तान लियोनल मेस्सी फ्रान्सेली क्लब पेरिस सेन्ट जर्मेन (पिएसजी)मा अनुबन्ध भएपछि पहिलो खेल खेलेको थियो । अर्जेन्टिनी स्ट्राइकर मेस्सी केही दिनअघिमात्र बार्सिलोनासँग २० वर्षे बसाइ अन्त्य गर्दै पेरिस पुगेका हुन् ।

घरेलु मैदान क्याप नोउमा बार्सिलोनालाई जित दिलाउन मार्टिन ब्रेथवेटले दुई तथा जेरार्ड पिके र सर्जी रोबर्टो एक–एक गोल गरे । सोसिडाडका लागि वुलेन लोबेटे सियनफुएगोस र मिकेल ओयार्जबालले एक–एक गोल गरे ।

जितसँगै बार्सिलोनाले नयाँ सिजनको ला लिगामा सुखद सुरुवात गरेको छ । सोसिडाडले भने हारबाट लिगको सुरुवात गरेको छ ।