प्रि–सिजनअन्तर्गत मैत्रीपूर्ण खेलमा इटालियन क्लब युभेन्टसले अटलान्टालाई सहजै हराएको छ । शनिबार राति स्टार खेलाडी क्रिस्टियानो रोनाल्डो सम्मेलित युभेन्टसले अटलान्टालाई ३–१ गोलले हराएको हो ।
घरेलु मैदानमा युभेन्टसलाई जिताउन पाउलो डेबाला, फेडेरिको बर्नान्डेस्ची र अल्भारो मोरटाले एक–एक गोल गरे । अटलान्टाका लुइस फर्नान्डोले एक गोल गरे ।
खेलको आठौँ मिनेटमा डेबालाले गोल गर्दै युभेन्टसलाई सुरुआती अग्रता दिलाएका थिए । १८औँ मिनेटमा फर्नान्डोले पेनाल्टीमा गोल गर्दै अटलान्टालाई खेलमा फर्काए ।
बर्नान्डेस्चीले ३९औँ मिनेटमा गोल गरेपछि पहिलो हाफमा युभेन्टसले २–१ गोलको अग्रता बनायो । खेलको इन्ज्युरी समयमा मोरटाले गोल गरेपछि युभेन्टसले ३–१ गोलको सहज जित निकालेको हो ।
यस खेलमा पोर्चुगलका कप्तान रोनाल्डो गोलविहीन बने । मैत्रीपूर्ण खेलमा कमै खेल्ने उनी अटलान्टासँगको खेलमा मैदान उत्रिएका थिए । तर ६३ औँ मिनेटसम्म मैदानमा रहँदा उनले गोल गर्न सकेनन् ।
युभेन्टस र अटलान्टाले सिरी ‘ए’को तयारीस्वरूप मैत्रीपूर्ण खेल खेलेका हुन् । नयाँ सिजनको सिरी ‘ए’ आगामी शनिबारबाट सुरु हुँदै छ । युभेन्टसले उडिनेस तथा अटलान्टाले टोरिनोसँग खेल्दै घरेलु लिगको थालनी गर्ने छन् ।