देशभर कोरोना सङ्क्रमण बढ्न थालेको छ । सङ्क्रमितको सङ्ख्या दैनिक पाँच हजारको हाराहारीमा पुग्न थालेपछि सरकारले द्रुत कार्य योजनालाई कार्यान्वयन गर्ने तयारी थालेको हो ।
विज्ञहरूका अनुसार सङ्क्रमण रोकथामको अचुक उपाय भनेकै मास्कको समुचित प्रयोग, भौतिक दुरी कायम र व्यक्तिगत सरसफाइ हो । तर, यी उपायहरू कार्यान्वयनमा हेलचेक्र्याइँ बढ्दै गएको छ । यस्तै, आम नागरिकलाई खोप पनि अर्को विधि हो तर, त्यो तत्कालका लागि असम्भव प्राय छ । कारण हालसम्म नेपालमा एक करोड पाँच लाख खोप भित्रिएको छ ।
खोप लगाउने योग्य जनसङ्ख्या दुई करोड ६५ लाख रहेको छ । सङ्क्रमण समुदाय स्तरमै फैलिएसँगै स्वयम् व्यक्ति सचेत र अनुशासित हुन सङ्क्रामक रोग विशेषज्ञहरूले आग्रह गरेका छन् । सरुवा रोग विशेषज्ञ डा.शेरबहादुर पुनले जनस्वास्थ्यका मापदण्ड कार्यान्वयन गर्न आग्रह गरे ।
मङ्सिरसम्म थप एक लाख ९३ हजार आठ सय ५६ जनामा कोरोना सङ्क्रमण हुने प्रक्षेपण गरेको स्वास्थ्य तथा जनसङ्ख्या मन्त्रालयले सङ्क्रमण रोकथाम तथा नियन्त्रणको तयारीमा रहेको जनाएको छ ।
स्वास्थ्य मन्त्रालयका अनुसार सङ्क्रमण रोकथामका लागि आइसियु बेड सङ्ख्या तीन हजार पुर्याइएको छ । यस्तै, ६ सय ३० आइसियु बेड थप गर्ने प्रक्रियामा स्वास्थ्य मन्त्रालय रहेको छ । हाल आइसियु बेड सङ्ख्या दुई हजार ६ सय रहेको छ ।
यस्तै, देशभरका अस्पतालमा भेन्टिलेटरको सङ्ख्या नौ सय पुर्याइएको छ । स्वास्थ्य मन्त्रालयका प्रवक्ता डा.कृष्ण पौडेलले भेन्टिलेटरको सङ्ख्या एक सय ८० थप गर्ने प्रक्रियामा रहेको बताए ।
सरकारी अस्पतालहरूमा हाइ डीपेन्डेन्सी युनिट(एच.डी.यु.) बेड सङ्ख्या दुई हजार ७५ र निजीमा सात सय ७८ थप गरी दुई हजार आठ सय ५३ सञ्चालनमा ल्याइएको छ । स्वास्थ्य मन्त्रालयले एक हजार चार सय हाइडीपेन्डेन्सी युनिट बेड थप गर्ने प्रक्रियामा रहेको जनाएको छ । स्वास्थ्य मन्त्रालयका प्रवक्ता डा. पौडेलका अनुसार बालबालिकाहरूका लागि एक सय ८० भेन्टिलेटरसहितको दुई सय ७५ आइसियु बेड थप्ने कार्य भइरहेको छ ।
कोभिड १९ लाई मध्यनजर गर्दै अक्सिजन आपूर्ति व्यवस्थालाई सुदृढ गर्न ६ हजार अक्सिजन सिलिन्डर थप भइसकेको स्वास्थ्य मन्त्रालयले जनाएको छ ।
स्वास्थ्य मन्त्रालयका प्रवक्ता डा.पौडेलले भने, ‘पाँच हजार पाँच सय अक्सिजन कन्सट्रेटरको व्यवस्था भइसकेको र थप तीन हजार पाँच सय आउने क्रममा रहेका छन् ।’
विगतमा प्रति हप्ता १५ मेट्रिक टन अक्सिजन आपूर्ति हुने गरेकोमा हाल एक सय २० मेट्रिक टन आपूर्ति भइरहेको छ । स्वास्थ्य मन्त्रालयका अनुसार सबै जिल्ला र १९ वटा ठुला अस्पतालहरूमा अक्सिजन प्लान्ट थप गर्नका लागि स्रोतको सुनिश्चितता गरिएको भन्दै भदौभित्र सम्पन्न गर्ने योजना रहेको छ ।
देशभर एक हजार आठ सय स्थानमा खुला सीमा रहेका छन् । उत्तरतर्फ चीनको रसुवा गढी र तातोपानी नाका, दक्षिणमा भारतसँग जोडिएका पशुपति नगर इलामदेखि दार्चुलाको पुल घाटसम्म गरी १३ वटा तोकिएका प्रवेश विन्दुमा हेल्थ डेस्क स्थापना गरिएका छन् । जसअन्तर्गत गत हप्तासम्म चार लाख २२ हजार आठ सय ५४ जनामा स्क्रीनिङ गर्दा ७७ हजार पाँच सय ४६ जनाको कोरोना परीक्षण गरिएको थियो । सो क्रममा चार हजार २० जनामा कोरोना सङ्क्रमण देखिएको थियो । सीमा नाकामा परीक्षण गर्दा औसतमा पाँच प्रतिशतमा सङ्क्रमण दर रहेको छ । अधिकांश सिमानाकामा हेल्थ डेस्क स्थापना गरिएको र केही स्थानमा हेल्थ डेस्क बन्ने क्रममा स्वास्थ्य मन्त्रालयले जनाएको छ ।
स्वास्थ्य मन्त्रालय नीति योजना तथा अनुगमन महाशाखा प्रमुख डा.गुणराज लोहनीले कोरोना सङ्क्रमण रोकथामका लागि अन्तर मन्त्रालय, सङ्घ, प्रदेश र स्थानीय तहबिच समन्वय जरुरी रहेको बताए । स्वास्थ्य मन्त्रालयका प्रमुख विशेषज्ञ डा.दीपेन्द्ररमण सिंहले कोरोना विरुद्धको खोप अभियानलाई द्रुत गतिमा अघि बढाइने बताए । यस्तै, सरकारले खोप सप्ताह र नेपाल मास्क अभियान सञ्चालनमा ल्याएको छ ।
