सरकारले कोरोनाविरुद्धको खोप अभियान जारी गरिरहेको बेला खोपको प्राथमिकतामा विद्यार्थीहरूलाई राखिएको छैन । केही विश्वविद्यालयहरुले भौतिक उपस्थिति सहित परीक्षा सञ्चालन गर्न थाले पनि उनीहरूलाई खोप लगाउन सरकारले चासो राखेको छैन ।
जस कारण विद्यार्थीहरूले पहिले खोप अनि परीक्षा भन्दै दबाबमूलक कार्यक्रम समेत गर्न थालेका छन् । स्वास्थ्य तथा जनसङ्ख्या राज्य मन्त्री उमेश श्रेष्ठले ६० लाख फाइजरको खोप निकट भविष्यमै आउन थालेको र सो खोप लगाइने बताए । सरकारले स्वास्थ्यकर्मी, फ्रन्टलाइनर, विदेशमा जाने नागरिक, ज्येष्ठ नागरिक, पत्रकारहरूलाई खोप लगाउने अभियानलाई जारी राखेको छ । विद्यार्थीलाई कहिलेबाट खोप लगाउने ? स्पष्ट जबाफ न त स्वास्थ्य मन्त्रालयले दिन्छ न त शिक्षा मन्त्रालय । लाखौँ विद्यार्थीहरूलाई खोप लगाउन सरकारले चासो देखाएको छैनन् । जस कारण विद्यालयहरूमा पनि भौतिक उपस्थिति सहित सञ्चालनमा आउन सकेका छैनन् । केही दिनयता शिक्षकहरूले परिचयपत्रका आधारमा खोप लगाएका छन् ।
विद्यार्थीको हकहितका लागि बोल्ने विद्यार्थी संगठनहरुले पनि नेतृत्व तहलाई दबाब दिन सकिरहेका छैनन् । कोरोना सङ्क्रमणका कारण सबै विश्वविद्यालयदेखि विद्यालय तहसम्म पठनपाठन सहज नहुँदा र खोपमा विद्यार्थी प्राथमिकतामा नपर्दा पनि विद्यार्थी संगठनहरुले विद्यार्थीको हकहितमा नेतृत्वदायी भूमिका निर्वाह गरेका छैनन् ।
उनीहरूले खोप भित्रिएको पाँच महिनापछि विद्यार्थीहरूलाई खोप दिलाउन भन्दै विज्ञप्ति निकाले पनि त्यो विज्ञप्ति औपचारिकतामा मात्रै सीमित भएको पीडित विद्यार्थीहरूको गुनासो छ । त्रिभुवन विश्वविद्यालयको विविएम तेस्रो सेमेस्टरमा अध्ययनरत विद्यार्थी पूर्णिमा चन्दले भनिन्, ‘कोरोना विरुद्ध खोप नेपाल भित्रिएको महिनौँ बित्यो । भौतिक उपस्थिति सहित अब परीक्षा दिनुपर्ने खोप लगाएको पनि छैन ।’
दाङ घर भई काठमाडौँ पढ्दै आएका नेपाल वैद्यले भने,‘ त्रिभुवन विश्वविद्यालयले परीक्षा तोकेको छ । म घरमै छु । सरकारले बन्दाबन्दी अझै खोलेको छैन भन्छ । कसरी परीक्षा दीने ?खोप त परको कुरा भयो ।’
अखिल क्रान्तिकारीका केन्द्रीय अध्यक्ष रञ्जित तामाङले विद्यार्थीका अधिकारका सवालमा राज्यका निकायहरूलाई घचघच्याइरहेका बताए । उनले भने, ‘हामी विद्यार्थीकै हकहितका लागि लागि परेका छौँ सेलाएका छैनौँ । कोरोनाका कारण विश्वविद्यालयको शैक्षिक क्यालेन्डरहरू अवरुद्ध भएको छ । सबै विद्यार्थीहरूलाई जतिसक्दो चाँडो खोपको व्यवस्था हुनुपर्छ भनेर राज्यलाई दबाब पनि दिएका छौँ ।’ उनले कोरोना सङ्क्रमणको अवस्थामा विद्यार्थीको पढाइ भन्दा जीवन ठुलो भएको बताए ।
अनेरास्ववीयूका केन्द्रीय अध्यक्ष ऐन महरले कोरोनाबाट शैक्षिक क्षेत्र आक्रान्त बनेको बताए । उनले भने, ‘बिश्वबिद्यालयको परीक्षा स्थगित गरेर समस्या समाधान हुँदैन । छिटोभन्दा छिटो परीक्षा दिने विद्यार्थीहरूलाई प्रवेश पत्रको आधारमा खोपको व्यवस्था गरी अबका परीक्षाहरू सञ्चालन गरिनु पर्छ ।’ उनले विद्यार्थीका अधिकार संस्थागतका लागि आफूहरू लागि परेको बताए ।
अखिल (क्रान्तिकारी)का नेता कुमार बर्तौलाले विद्यार्थीको हकहितमा आफूहरूले आवाज उठाइरहेका बताए । उनले भने, ‘विद्यार्थीका मुद्दाहरू उठाइरहेका छौँ । तर, हामीले उठाएका मुद्दाहरू छाँयामा परेका छन् ।’ उनले जनस्वास्थ्यका मापदण्डहरू र भौतिक दुरी कायम गरेर हाल सञ्चालनमा रहेका परीक्षाहरू सञ्चालन गर्नुपर्ने बताए । हाल सरकारले देशभर खोप अभियान सञ्चालन गरिरहेको छ । सरकारले दुई करोड ६५ लाख नागरिकलाई खोप लगाउने लक्ष्य लिएको छ ।