अखिल नेपाल फुटबल सङ्घ (एन्फा) भित्रको विवाद पछिल्लो मात्र होइन, लामो समयदेखि नै चल्दै आइरहेको छ । तर पछिल्लो एक सातायता भने एन्फाभित्रको विवाद उत्कर्षमा पुगेको अनुमान गर्न सकिन्छ । एक साताअघि मात्र एन्फाको होस्टल व्यवस्थापन समितिबाट राजीनामा आएको थियो । यस्तै टेक्निकल समितिका कुशल थापाले राजीनामा आयो । आइतबारमात्र मुख्य प्रशिक्षकले राजीनामा दिनुले पनि एन्फाभित्रको वातावरण ठिक छैन भन्ने अनुमान लगाउन सकिन्छ ।
यसअघि पनि खेल क्षेत्रका लागि सरकारबाट पर्याप्त बजेट पाउँदा पनि लगानी गर्न नसकेको आरोप खेप्दै आएको एन्फाको पछिल्लो विवाद भने निकै चर्चित बन्यो । विवाद हो, प्रशिक्षक अब्दुल्लाह अलमुताइरी र एन्फाका वरिष्ठ उपाध्यक्ष पङ्कजविक्रम नेम्वाङबीचको । कतिपयले यो विवादलाई आगामी वैशाखमा हुन लागेको एन्फाको निर्वाचनअगाडिको ‘स्टन्ट’ मान्छन् भने कतिपयले प्रशिक्षक अलमुताइरीको व्यक्तिगत भावनात्मक कदमका रूपमा हेर्छन् । एन्फा स्रोतका अनुसार एन्फा अहिले पनि दुई धारमा छ । अध्यक्ष कर्माछिरिङ शेर्पाको एउटा धारमा छ भने उपाध्यक्ष नेम्वाङको अर्को धार छ । आगामी चुनावमा उपाध्यक्ष नेम्वाङले अध्यक्ष पदका लागि दाबी गर्दै आएको र वर्तमान अध्यक्ष शेर्पा पनि दाबेदारकै रूपमा छन् ।
यसैले, चुनावलक्षित स्टन्टका लागि प्रशिक्षकको राजीनामा आएको एन्फा स्रोतको दाबी छ । एन्फाकै अर्को स्रोत भने यो मान्न तयार छैन । प्रशिक्षक अलमुताइरीको प्रयोग गरेर एन्फामा राजनीति हाबी भएका एउटा स्रोतको दाबी छ । अनि उनको राजीनामा व्यक्तिगत भावनात्मक कदमका रूपमा रहेको अर्को स्रोतको दाबी छ । नेम्वाङसँग पछिल्लो समय अलमुताइरीको सम्बन्ध चिसिएको, पछिल्लो तीन सातादेखि उपाध्यक्षबाट असहयोग पाइरहेका कारण प्रशिक्षकले राजीनामा दिएको अर्को स्रोतले जनाएको छ ।
प्रशिक्षक अलमुताइरीले पनि खेलप्रेमी नेपालीलाई सम्बोधन गर्दै नेम्वाङकै कारण फुटबल टिम छोड्ने निर्णय गरेको जानकारी गराएका थिए । राजीनामा दिने घोषणा गर्दा उनले उपाध्यक्ष नेम्वाङलाई मेन्सनसहित गर्न भ्याए । उनले भनेका थिए, ‘म अब राजीनामा गर्न जाँदैछु, खुसी हुनुहुन्छ नि नेम्वाङजी ?’ यस प्रश्नले गतल को हो भन्ने सुई नेम्वाङतिरै फर्किन्छ ।
आफू राजीनामा गर्न जान लागेको जनाएका अलमुताइरीले नेम्वाङलाई प्रश्न गर्नुले पनि एन्फाभित्र स्टन्ट र भावनात्मक आवेग दुवैले स्थान लिएको आँकलन गर्न सकिन्छ । तथापि, नेम्वाङ आफूमाथि षडयन्त्र भएको जिकिर गर्छन् । उनले आफू दोषी देखिए एक सेकेन्ड पनि एन्फामा नबस्नेसमेत बताएका छन् ।
यता, एन्फाका प्रवक्ता किरण राई पनि प्रशिक्षकको राजीनामालाई व्यक्तिगत भावनासँग जोड्छन् । एन्फा पदाधिकारीसँग असन्तुष्ट रहेकै कारण अलमुताइरीले आवेगमा राजीनामा घोषणा गरेपनि लिखित रूपमा कुनैपनि पत्र नआएको राई बताउँछन् । ‘अझै पनि यो विषयको तथ्यगत प्रमाण भेटिसकेका छैनौँ’, राई भन्छन्, ‘तर यसबीचमा केही भ्रमहरू सिर्जना भएर उहाँले यो निर्णय लिनुभएको होला । तथापि, हामी यसको कारण खोतल्नेक्रममा छौँ ।’
खुसी छैनन् खेलाडी
अलमुताइरीको नेतृत्वमा मैदान उत्रिँदा नेपाली टिममा थप आत्मबल बढेको थियो । अलमुताइरीको नेतृत्वमा नेपालले कुवेतमा विश्वकप छनोटका तीन खेल खेलेको थियो । ती खेलपछि नै नेपाली टोलीका अधिकांश खेलाडी प्रशिक्षक अलमुताइरीबाट प्रभावित बनेका थिए । राष्ट्रिय टोलीका कप्तान किरण चेमजोङलगायतले उनको खुलेर प्रशंसा गरेका थिए ।
उनै किरणले एन्फाभित्रको विवादको समाधान खोज्न जोड दिएका छन् । गल्ती खोज्नुभन्दा समाधानतिर अग्रसर हुन सुझाव दिँदै उनले भने, ‘राष्ट्रिय फुटबल टोली एक परिवार हो र परिवारको एक सदस्य भएको हैसियतमा हामीले थुप्रै उतारचढाव सुनेका छौँ । को सही को गलत जानकारी नभएपनि राष्ट्रिय टोलीको कुनैपनि सदस्यलाई गुमाउन चाहँदैनौँ ।’ उनले आगामी खेल र प्रतियोगिताका लागि समेत एकढिक्का भएर अगाडि बढ्नुपर्ने भएकोले समाधान खोज्न आग्रह गरेका छन् ।
राजीनामा फिर्ता लिन एन्फाको आग्रह
आइतबार प्रशिक्षक अलमुताइरीले राजीनामाको घोषणा गरेपछि एन्फाले उनलाई कार्यालयमा डाकेको थियो । अनुहारमा तनाव लिएर एन्फा पुगेका उनलाई अध्यक्ष शेर्पा र प्रवक्ता राई मिलेर सम्झाए । तर प्रशिक्षकले म तनावमा छु भनेपछि उनलाई आराम गर्न पठाइएको थियो । त्यसपछि अध्यक्ष शेर्पा पनि पोखरातर्फ हिँडे । तर बाटोबाट नै फोन लगाएर अध्यक्ष शेर्पाले अलमुताइरीलाई राजीनामा फिर्ता लिन आग्रह गरेका थिए ।
अध्यक्ष शेर्पा पनि यो राजनीतिक स्टन्ट नभएर व्यक्तिगत आवेग भएको बताउँछन् । ‘मैले यसअघि पनि राजीनामा फिर्ता लिन भनेको थिएँ’, शेर्पा भन्छन्, ‘पटक–पटक भन्छु, मिलेर जानुपर्छ । जहाँसम्म राजीनामाको कुरा आउँछ, त्यो राजनीतिक स्टन्ट नभइ व्यक्तिगत आवेश हो । सबै ठिक हुन्छ । उहाँले राजीनामा फिर्ता लिनुहुन्छ ।’
कहाँबाट सुरु भयो विवाद ?
एन्फाले कुवेतका प्रो–लाइसेन्स प्राप्त प्रशिक्षक अलमुताइरी गत चैतमा मुख्य प्रशिक्षकमा नियुक्त गरेको थियो । एएफसी कोचिङ इन्स्ट्रक्टरसमेत रहेका उनलाई एन्फाले एक वर्षको लागि मुख्य प्रशिक्षकको जिम्मेवारी सुम्पिएको थियो । हेड कोच बनेपछि अलमुताइरीको नेतृत्वमा नेपालले कुवेतमा विश्वकप छनोटका तीन खेल खेलेको थियो । जसमा नेपालले चाइनिज ताइपेलाई २–० गोल अन्तरले पराजित गरेका थियो । तर नेपाल जोर्डनसँग ३–० गोल र अस्ट्रेलियासँग पनि ३–० गोल अन्तरले नै पराजित भएको थियो ।
त्यसअघि नेपालले इराकसँग मैत्रीपूर्ण खेल खेलेको थियो । उक्त खेलमा नेपाल इराकसँग ६–२ गोल अन्तरले पराजित भएको थियो । अलमुताइरीको कामबाट एन्फाको अध्यक्ष पक्ष सन्तुष्ट देखिएको थियो तर नेम्वाङ पक्ष भने सन्तुष्ट थिएन । स्रोतका अनुसार नेम्वाङ पक्षले आफ्नो असन्तुष्टि राख्दै मुख्य प्रशिक्षक अलमुताइरीलाई सुझाव दिएको थियो । तर, जवाफमा अलमुताइरीले ‘ब्रदर’ शव्दको प्रयोग गरेका थिए ।
मुख्य प्रशिक्षकले आफूलाई ब्रदर भनेपछि नेम्वाङ एन्फा महासचिव ईन्द्रमान तुलाधरसमक्ष उजुरी लिएर पुगेका थिए । त्यसपछि एन्फाले प्रशिक्षक अलमुताइरीलाई स्पष्टीकरण सोधेको थियो । त्यहाँबाट सुरु भएको ‘द्वन्द्व’ले यहाँसम्मको अवस्था सिर्जना गरेको एन्फा स्रोत बताउँछ ।