सेती प्रादेशिक अस्पतालको शव गृह दुर्गन्धित बन्दै गएको छ । जीर्ण बन्दै गएको शव गृह व्यवस्थित नगरिँदा र नजिकै रहेको फोहोर सङ्कलन केन्द्रका कारण दुर्गन्धित बन्दै गएको छ ।
टिनको छानो भएको शव गृहभित्र वर्षातको समयमा पानी चुहिने गरेको छ । अहिले शव गृहमा दुई शव मात्रै राख्न सकिने व्यवस्था छ । त्यो पनि लामो समय राख्न सकिँदैन । शव राख्ने स्थान पनि गतिलो छैन ।
‘शव गृहमा राखिएका शवमा चार/पाँच घण्टामै किरा लाग्ने गरेको छ’ एम्बुलेन्स चालक लक्ष्मण सिंहले भने शव गृहलाई व्यवस्थित गर्नमा कसैको ध्यान गएको छैन ।उनले फोहोर सङ्कलन केन्द्र नजिक हुँदा पनि आम नागरिकहरूले मुख थुनेर शव बुझ्न जानुपर्ने अवस्था रहेको बताए ।
सेती प्रादेशिक अस्पतालमा रहेको शव गृह जीर्ण बन्दै गइरहेको कारण प्रदेशको एक मात्र रेफरल अस्पतालले विगत लामो समय देखि शव गृहको समस्या खेप्दै आएको जनाइएको छ ।सो शव गृह मापदण्ड अनुसार नरहेको अस्पतालका मेडिकल सुपरिटेण्डेण्ट डाक्टर हेमराज पाण्डेयले स्वीकार गरे ।
उनले लामो समय शवलाई राख्नुपर्दा फ्रिजको आवश्यकता पर्ने भए पनि फ्रिज नहुँदा समस्या भएको बताए ।‘पर्याप्त मात्रामा शव गृह भित्र ठाउँ छैन’ उनले भने ।
आधुनिक र नयाँ शव गृह बनाउनका लागि अस्पतालले माग गरे पनि जग्गा अभावका कारण समस्या भएको छ ।उनले भने जग्गा नहुँदा नयाँ शव गृह बनाउन सकिएको छैन । अब हामीले यही शव गृहलाई मर्मत गराउने भनेका छौँ । यसमा पनि समस्या रहेको छ ।’
उनले भने ‘शव गृह मर्मत गर्ने हो तर, सो समयमा शवको व्यवस्थापन कहाँ गर्ने भन्ने पनि समस्या रहेको छ ।’
