नेकपा एमालेको दशौँ राष्ट्रिय महाधिवेशन आयोजक कमिटी केन्द्रीय कमिटीमा रूपान्तरण भएपछिको पहिलो बैठक बसिरहेको छ ।
प्रधानमन्त्री निवास बालुवाटारमा बसिरहेको बैठकले कांग्रेस सभापति शेरबहादुर देउवालाई प्रधानमन्त्री बनाउन गरेको हस्ताक्षर दुई दिनभित्र फिर्ता लिन २३ सदस्यलाई निर्देशन दिएको छ । तर बैठकमा वरिष्ठ नेता माधवकुमार नेपाल समूह भने उपस्थित भएको छैन । वरिष्ठ नेता झलनाथ खनाल उपचारका लागि भारतमा छन् । उपाध्यक्ष वामदेव गौतम भने बैठकमा उपस्थित भएका छन् ।
सर्वोच्च अदालतको गएको फागुन २३ गतेको फैसलाबाट एमाले र माओवादी एकताअघिको अवस्थामा पुगेपछि एमालेको फागुन २८ गतेको केन्द्रीय कमिटीको बैठकले आयोजक कमिटी गठन गरेकामा नेता नेपाल समूहले असन्तुष्टि जनाउँदै आएको थियो ।
खनाल–नेपाल समूहको हिजो बसेको बैठकले केन्द्रीय कमिटी बैठकमा सहभागी नहुने निर्णय गरेको थियो ।
माधव नेपाल विपक्षी गठबन्धन छाडेर एमालेमा फर्किने अवस्था तत्काललाई एकदमै न्यून छ । नेता नेपाल स्वयंचाहिँ अब ओलीसँगै बस्न नसकिने निष्कर्षमा पुगिसकेका छन् । यसलाई उनका पछिल्ला सार्वजनिक टिप्पणीले नै पुष्टि गर्छ ।
ओलीले समेत नेपालबाहेकका धेरै नेतालाई आफूतिर फर्काउने र नेपाललाई जतिसक्दो तर्काउने नीति लिएका छन् ।