प्रधानमन्त्री केपी शर्मा ओली नेतृत्वको सरकारको प्रवक्ताको जिम्मेवारी नवनियुक्त सञ्चारमन्त्री नैनकला थापाले पाएकी छन।
पूर्व गृहमन्त्री रामबहादुर थापा ‘बादल’का धर्मपत्नी थापालाई प्रधानमन्त्री केपी शर्मा ओलीले आज बिहीबार सो जिम्मेवारी प्रदान गरेका हुन् । आज सिंहदरबारमा बसेको मन्त्रिपरिषद् बैठकले थापालाई जिम्मेवारी दिएको हो। विगतमा पनि सञ्चारमन्त्रीलाई सरकारको प्रवक्ता तोक्ने परम्परा थियो।
यसअघि नेकपा (माओवादी केन्द्र) का केन्द्रीय सल्लाहकारको जिम्मेवारीमा रहेकी सञ्चारमन्त्री थापा पछिल्लो समय श्रीमान बादलसँगै नेकपा (एमाले) मा प्रवेश गरेकी थिइन् । २०३५–०३६ सालदेखि नै राजनीतिमा सक्रिय रहेहकी मन्त्री थापाले स्नातकसम्मको अध्ययन गरेकी छिन् ।
सरकारका औपचारिक निर्णयहरु सञ्चारमन्त्रीमार्फत सार्वजनिक गर्ने प्रचलन छ। थापाले बिहीबार साँझ मात्र पद तथा गोपनीयताको शपथ लिएकी थिइन्। प्रधानमन्त्री ओलीको सिफारिसमा राष्ट्रपति विद्यादेवी भण्डारीले सात मन्त्री र एक राज्यमन्त्री नियुक्त गरेकी हुन।
