सञ्चार तथा सूचना प्रविधि मन्त्रालयको जिम्मेवारी नैनकला थापाले प्राप्त गरेकी छिन् । पूर्व गृहमन्त्री रामबहादुर थापा ‘बादल’का धर्मपत्नी थापालाई प्रधानमन्त्री केपी शर्मा ओलीले आज बिहीबार सो जिम्मेवारी प्रदान गरेका हुन् ।
रुपन्देहीको बुटवलमा जन्मेकी सञ्चारमन्त्री थापा यसअघि राष्ट्रिय महिला आयोगको अध्यक्ष भएर चार वर्षे जिम्मेवारी निर्वाह गरिसकेकी छिन् । त्यस्तै, महिला बालबालिका तथा जेष्ठ नागरिक मन्त्रालयको महिलासम्वन्धी विज्ञ समुह सदस्यको रुपमा पनि उनले अनुभव प्राप्त गरेकी छिन् ।
यसअघि नेकपा (माओवादी केन्द्र) का केन्द्रीय सल्लाहकारको जिम्मेवारीमा रहेकी सञ्चारमन्त्री थापा पछिल्लो समय श्रीमान बादलसँगै नेकपा (एमाले) मा प्रवेश गरेकी थिइन् । २०३५–०३६ सालदेखि नै राजनीतिमा सक्रिय रहेहकी मन्त्री थापाले स्नातकसम्मको अध्ययन गरेकी छिन् ।
रुपन्देहीमा जन्म भएपनि हाल चितवनको बासिन्दा भएकी सञ्चारमन्त्री थापाले कालीका माध्यमिक विद्यालय बुटवल र नारायणी मावि चितवनमा लामो समय शिक्षिकाको रुपमा अध्यापन गराइकी थिइन् ।
सञ्चारमन्त्री थापा २०३८ मा नेकपा (चौम) पार्टी सदस्य, २०३८ मै अ.ने.म.संघ जिल्ला सचिव, २०४२ मा अ.ने.म.संघ केन्द्रीय महासचिव, २०४७ मा अ.ने.म.संघ केन्द्रीय संयोजक, २०५० मा एकीकृत अ.ने.म.संघ केन्द्रीय महासचिव भएर काम गरिसकेकी छिन् ।
यो समाचार गोरखापत्रले उत्पादन गरेको हो ।