कोरोना सङ्क्रमण भएर होम आइसोलेनमा रहेका सङ्क्रमितहरुलाई गण्डकी प्रदेशले फोनबाट परामर्श दिन सुरु गरेको छ ।
गण्डकी प्रदेशका मुख्यमन्त्री पृथ्वीसुव्वा गुरुङले बुधबारबाट प्रदेशमा होम आइसोलेशनमा रहेकालाई फोनबाट परामर्श दिने कामको सुरुवात गरिएको बताएका छन् । मुख्यमन्त्री गुरुङका अनुसार गण्डकी प्रदेशमा करिव ८ हजार व्यक्तिहरु होम आइसोलेसनमा रहेका छन् । उनीहरुलाई पोखरा नर्सिङ कलेजका १२५ जनाभन्दा बढी नर्स तथा अन्य विज्ञ चिकित्सकहरुले परामर्श दिनेछन् ।
मङ्गलबारसम्मको तथ्याङ्कअनुसार गण्डकी प्रदेशमा २ लाख ८ हजार ९६५ जनाको परीक्षण गर्दा ४७ हजार भन्दा बढीमा सङ्क्रमण देखिएको छ । जसमध्ये ३९ हजार निको भएका छन् भने ८ हजारभन्दा बढी सक्रिय सङ्क्रमित रहेका छन् । अहिलेसम्म उक्त प्रदेशमा कोरोनाको कारण ७९८ जनाको निधन भैसकेको छ ।