प्रायजसो प्रत्येक पटकका चुनावमा दोहोरिने एउटै वाक्य हो, ‘पत्रकार महासङ्घ दलीय दलदलमा फस्यो । अर्थात् गैर पत्रकार पत्रकारका नेता भए । राजनीतिक दलका गोजीका पात्र महासंघमा पुगे । दलले टिकट दिएर चुनाव लड्नेहरु पत्रकारका नेता बने, आदि’ यी प्रत्येक पटक पत्रकार महासंघको निर्वाचन हुँदा सुनिने गुनासा हुन् । तर, चुनावमा जित्ने तिनै दलका उम्मेदवार । दलका नेताले टिकट दिएकाहरू । यो पटकको महासंघको चुनावमा पनि यस्तै आवाज मुखरित भए ।
पहिलेको भन्दा बलियो बलियो रूपमा । सामूहिक रूपमा । यसको असर उम्मेदवारी मनोनयनमा समेत देखियो । तीन ठुला दलका दुई गठबन्धन तोड्न केहीले स्वतन्त्र उम्मेदवारी दिए । बागीलाई छोडेर एकल उम्मेदवारी दिनेको सङ्ख्या सुरुवातमा राम्रै थियो । बागी त यस पटक मात्रै होइन विगतमा पनि दिने गरेकै थिए । तर, उनीहरू पार्टीले टिकट नदिएपछि विद्रोह गर्ने हुन् । यस पटक पनि गरे । यसलाई त्यतिमै बुझौँ ।
तर, जब जब निर्वाचन नजिकिँदै गयो । उम्मेदवारले हात झिक्दै गए । चर्चामा रहेको अध्यक्षका दाबेदार राम प्रसाद दाहालले हात झिके । उनले एक्कासि हात झिके पनि पत्रकारहरूको माझमा ठुलै बहस भयो । उनले कोरोना कालमा बेरोजगार भएका पत्रकारहरूलाई धेरै नै सहयोग गरेका थिए । साँच्नै भन्नुपर्दा उनी श्रमजीवी पत्रकारका आशाका केन्द्र नै थिए ।
उम्मेदवारी दर्ता गराएपछि उनले केटिएम दैनिकसँग कुरा गर्दै आफ्नो एजेन्डा प्रस्तुत गरेका थिए । उनको एजेन्डाहरू धेरै श्रमजीवी पत्रकारहरूले मन पनि पराएका थिए । अन्त्यमा उनले हात झिके पछि केही पत्रकारहरू निराश भए भने केहीले पैसा र पदको अगाडी सत्य टिक्दैन भनेर आरोप पनि लगाए । खैर, परिस्थिति जे भए पनि उनी आफ्नो संस्थाको अगाडी झुकेर नै छाडै ।
उनको उम्मेदवारी फिर्ता लिएको घोषणा गर्न थापाथलीमा रहेको काठमाडौँ व्यान्केटमा कार्यक्रमको आयोजना नै गरियो । उम्मेदवारी फिर्ता लिएका रामप्रसाद दाहाल, रामजी दाहाल र रमेश मिश्र उपस्थित थिए । उनीहरूले नजानिँदो तरिकाले पार्टीले आफूलाई अन्याय गरेको गुनासो गरे ।
कार्यक्रममा बोल्दै राम प्रसाद दाहालले आफू पटक पटक अन्यायमा परेको बताए । धेरैलाई उनले लोभ लालच या पार्टीले अन्य सेवा सुविधा या पैसा दिएर उनले उम्मेदवारी फिर्ता लिएको बुझेका छन् । सामाजिक सञ्जालमा यस्ता खालका टीकाटिप्पणी आइरहेको छ । तर उनले विपुल पोख्रेलको लागि आफू हारेको बताए । कार्यक्रममा बोल्दै गर्दा उनका गला अवरुद्ध भए निकै कठोर मनका साथ दाहाले भने “२०६५ सालमा नेपाल प्रेस युनियनले सचिव पदमा टिकट दियो तर पछि खोस्यो त्यसो गर्न पाइन्छ । के सङ्गठनमा लाग्ने भनेको अत्याचार सहन मात्र हो ?”
कार्यक्रममा बोल्ने क्रममा वरिष्ठ उपाध्यक्षका उम्मेदवार राम जी दाहाले पत्रकारिता दल निकट भन्दा पनि व्यवसायिक हुनुपर्नेमा जोड दिए । आफूले संस्थाको मर्यादा कायम राख्ने र आगामी दिनमा विपुल नेतृत्वको टिममा लागेर चुनावी अभियानमा सहभागी हुने बाचा समेत गरे ।
सुरुमा हौसिएर दलीय सिन्डिकेट र गुटबन्दी तोड्न भन्दै उम्मेदवारी दिएर फिर्ता लिनेको सूची लामो छ । राजेश मिश्र, प्रकाश थापा, केपी ढुगांना, नकुल अर्याल, मुक्त्तिबाबु रेग्मीलगायतले अन्तिम अन्तिममा आएर उम्मेदवारी फिर्ता दिए । अब सिन्डिकेट तोड्न भन्दै अध्यक्षमा उम्मेदवारी दिएका गजेन्द्र बुढाथोकी र कोषाध्यक्षमा उम्मेदवारी दिएका माधव दुलाल मात्र छन् ।
तल्लो कमिटीमा थप केही होलान् । निर्वाचनको अघिल्लो दिनसम्म सीमित औलामा गन्न सकिने व्यक्ति मात्रै दलीय सिण्डिकेट विरुद्ध भिड्न तयार छन् ।
उनीहरूलाई पनि उम्मेदवारी फिर्ता लिन दबाब नआएको हैन तर पनि आजको दिनसम्म अडिग रहेका छन् । सम्भवतः उनीहरूले आफ्नो उम्मेदवारी फिर्ता लिने छैनन् । दुवै जना उम्मेदवार पत्रकारिता क्षेत्रमा लामो समयदेखि काम गरेकै हुन् । बुढाथोकी स्वतन्त्र भन्न रुचाउँछन् भने दुलाल काँग्रेसको भातृसंगठन युनियन निकट हुन् । बुढाथोकी कुनै पनि हालतमा उम्मेदवारी फिर्ता नलिने पक्षमा छन् भने दुलाललाई काँग्रेसका प्रवक्ता विश्वप्रकाश शर्मा देखि लिएर, सभापति शेरबहादुर देउवा समेतले फिर्ता दिन दबाब दिँदै आएका छन् ।
केटिएम दैनिकसँग कुरा गर्दै उनले आफूलाई कुहिएको फर्सी बनाउन लागेको गुनासो गरे ।
हेरौँ उनी सँग गरिएको कुराकानी
किन ब्याक भए ?
पहिलो कुरा अधिकांश दलीय सिन्डिकेट तोड्न होइन दलीय गुटविरुद्ध उभिएका थिए । दलले टिकट नदिएपछि उनीहरू बागी बनेर उठेको प्रस्टै छ । उनीहरू निकट दलले के गरेर बार्गेनिङ गर्यो उनीहरू तयार भए । यस्तै उम्मेदवारी फिर्ता लिने मध्येका अर्का एक हुन् केपी ढुंगाना । एसोसिएट सचिवमा उम्मेदवारी दिएका उनले अन्तिममा आएर हात झिके । उनका अनुसार अहिलेको पत्रकार महासंघ समाचार लेख्नेहरूका लागि होइन। समाचार लेख्नेहरू त्यता नलागेकै जाती। त्यही भएर उनले हात झिकेको प्रष्टीकरण दिए । तर, यो कुरा उनलाई पहिल्यै थाहा थिएन ? अनि महासङ्घ लेख्नेहरूका लागि नभए कसका लागि ? यसलाई लेख्नेहरूको कसले बनाइदिने ? उनी पनि दलीय सिन्डिकेटका अगाडि घुँडा टेके । अस्ता थुप्रै उम्मेदवार थिए । जसले अन्तिममा आएर हात झिके ।
त्यस्तै लामो समयदेखि पत्रकारिता क्षेत्रमा क्रियाशील रहेका पत्रकार नकुल अर्यालले पनि आफ्नो संगठनको लागि उम्मेदवारी फिर्ता लिएको बताए । उनी आफू अझै निखारिएर महासङ्घमा आउने कुरामा जोड दिए ।
२५ गते निर्वाचन हुँदै छ । उम्मेद्वारहरु मत माग्न तल्लीन छन् । यो पटकको चुनाव विगतको भन्दा भिन्न छ । भिन्न यस अर्थमा कि यस पटक महासङ्घमा आबद्ध सबै पत्रकारले मत दिन पाउनेछन् । हामीले यसअघि पनि भन्दै आएको कुरा के हो भने दलीय छत्रछायामा उम्मेदवार बनेका सबै उस्तै छैनन् ।
केही व्यवसायिक, आम पत्रकारको हितमा खट्ने व्यक्ति पनि छन् । केही दलीय सिन्डिकेट तोड्न भन्दै स्वतन्त्र उठेका उम्मेदवार पनि बाँकी छन् । अब सोच्ने निर्णय लिने बेला आएको छ । कसलाई चुन्ने ? कस्तो व्यक्तिलाई नेता बनाउने ? कसलाई नेतृत्वमा पठाउने ? कुन प्रत्याशी कस्ता चरित्रका हुन् स्वविवेकले मूल्याङ्कन गरेर निर्णय गर्ने बेला आएको छ । यो बेला विवेक प्रयोग गरिएन भने पुनः पुरानै प्रवृत्तिको जित हुनेछ । हामी महासङ्घमा राजनीति हाबी भयो भनेर गाइरहेनछौ ।
यो केटिएम दैनिकको विशेष स्तम्भ हो । मिडिया, पत्रकार र यससँग सम्बन्धित विषयमा केन्द्रित यो स्तम्भ प्रत्येक साताको मङ्गलवार प्रकाशन हुन्छ तर पत्रकार महासंघको चुनाव नजिकिँदै गएको हुनाले यसलाई यो हप्ता सोमबार नै प्रकाशित गरिएको हो । तपाइसँग पनि यस क्षेत्रका सूचनाहरू छन् र ती कुराहरू उजागर गर्न चाहनुहुन्छ भने हामीलाई फोन वा इमेलमा सम्पर्क गर्न सक्नुहुन्छ । तपाईँले आफ्नो गोपनीयता कायम राख्न चाहनुहुन्छ भने पनि तपाइको गोपनीयता कायम गरिनेछ । एसएमएसको लागि 9851186993 र इमेलको लागि ktmdainikofficial{at}gmail.com