नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीको पतन निश्चित भएको बताएका छन् । प्रचण्डले प्रतिगमनको अन्त्य गर्नका लागि जनता नै निर्णायक शक्ति भएकाले ओलीको पतन निश्चित भएको बताएका हुन् ।
बिहीवार पेरिसडाँडामा जनसंघर्ष समितिको सचिवालय बैठकमा अध्यक्ष प्रचण्डले प्रधानमन्त्री ओलीले देशलाई कालो सुरुङमा हाल्न खोजेकाले त्यो प्रयास आफूहरुले विफल पार्ने बताए ।
प्रतिगमन परास्त गर्न जनता निर्णायक संघर्षमा उत्रिनु पर्ने बताउँदै उनले भने, ‘देश जोगाउन निर्णायक संघर्षमा उत्रिनुको अब विकल्प छैन, जनता नै अब निर्णायक शक्ति हुन्, जनता सडकमा ओर्लिएपछि तानाशाही बन्न खोजेका ओलीको पतन हुन्छ।’
गत पुस ५ गते प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गरेपछि अनौपचारिक रुपमा विभाजित भइसकेको नेकपा दुवै पक्षका नेताहरुरले एक अर्कालाई आरोप–प्रत्यारोप गरिरहेका छन्।