बाग्लुङ सडकखण्डमा गएराति भएको सवारी दुर्घटनामा परी एक जनाको मृत्यु भएको छ । पोखरा महानगरपालिका–२ बाग्लुङ बसपार्क अगाडि राति हरिचोकबाट जिरोकिमीतर्फ आउँदै गरेको ग१ज ५८९६ नंको बलेरो जीपले बाटो काट्ने क्रममा ग १२ प ५३१३ नंको स्कुटरलाई ठक्कर दिँदा कास्कीको माछापुच्छ्रे गाउँपालिका–७ धम्पुसका २६ वर्षीया स्कुटर चालक तारा विकको मृत्यु भएको जिल्ला प्रहरी कार्यालयका प्रवक्ता एवंम प्रहरी नायब उपरीक्षक सुवास हमालले बताए ।
दुर्घटना लगत्तै घाइते विकलाई उपचारका लागि फिस्टेल अस्पतालमा पुर्याइए पनि चिकित्सकले बाटोमै निधन भएको घोषणा गरेका थिए । प्रहरीले जीप चालक गोर्खा आरुघाट गाउँपालिका–९ बस्ने २१ वर्षीय सुदीप विकलाई नियन्त्रणमा लिएर घटनाको अनुसन्धान गरिरहेको जनाएको छ ।
त्यस्तै पोखरामा मोटरसाइकलको ठक्करबाट एक महिला घाइते भएकी छन् । शनिवार बिहान पोखरा महानगरपालिका वडा नम्वर – २६ बुढीबजारमा प्रदेश नं -२ (०१) ००१ प १९७९ नम्वरको मोटरसाइकलले पैदलयात्री पोखरा २७ रिठ्ठेपानी बस्ने वर्ष ३२ कि सिता गुरुङलाई ठक्कर दिंदा गम्भीर घाइते भएको प्रदेश प्रहरी कार्यालय पोखराले जनाएको छ ।
घाइते गुरुङको हाल गण्डकी मेडिकल कलेजमा उपचार भइरहेको छ । उनको स्वास्थ्य अवस्था चिन्ताजनक रहेको प्रहरीले जानकारी दिएको छ । घटनाको सम्बन्धमा अनुसन्धान भैरहेको प्रहरीको भनाई छ ।