जनकपुरधाम । कर्णाली प्रदेशमा आयोजना हुने दशौँ राष्ट्रिय खेलकुद प्रतियोगिताका लागि मधेस प्रदेशले ७०९ सदस्यीय टोली सहभागी गराउने भएको छ । प्रतियोगितामा सहभागी हुने खेलाडी छनोटका लागि प्रदेशले बिहीबारदेखि प्रदेशस्तरीय छनोट प्रक्रिया सुरु गरेको छ ।
प्रतियोगितामा समावेश ३२ खेल विधिमध्ये मधेसले २९ विधामा सहभागिता जनाउने मधेस प्रदेश खेलकुद परिषद्का सदस्यसचिव शिवजीप्रसाद कानूले जानकारी दिए । टोलीमा खेलाडीसँगै प्रशिक्षक, निर्णायक र व्यवस्थापकसमेत रहनेछन् ।
प्रतियोगिताका केही विधाका खेल मंसिर ८ देखि सुरु हुनेछन् भने मुख्य प्रतियोगिता मंसिर १६ देखि २७ गतेसम्म सञ्चालन गर्ने तयारी छ । तर, बजेट अभाव र प्रदेश सरकारको अस्थिरताका कारण तयारीमा चुनौती थपिएको खेलकुद पदाधिकारीले बताएका छन् । बजेटको ५० प्रतिशत रोक्का तथा कटौती हुँदा सीमित स्रोतसाधनबाट तयारी गर्नुपरेको उनीहरूको भनाइ छ ।
कठिनाइका बाबजुद खेलाडीको उत्साह र विभिन्न खेल संघसँगको समन्वयमा छनोट प्रक्रिया अघि बढाइएको सदस्यसचिव कानूले बताए । कबड्डी, भलिबल, कराँते, तेक्वान्दो र क्रिकेटमा पदक जित्ने सम्भावना रहेको उल्लेख गर्दै उनले मधेसको मौलिक खेल कुस्तीमा पनि प्रदेशले राम्रो नतिजा ल्याउन सक्ने बताए ।
खेलकुदमा पर्याप्त लगानी गर्न सके मधेसले राष्ट्रिय प्रतियोगितामा उत्कृष्ट प्रदर्शन गर्न सक्ने उनको भनाइ छ । खेलकुदले विभिन्न राजनीतिक तथा वैचारिक पृष्ठभूमिका व्यक्तिलाई एउटै मञ्चमा जोड्नुका साथै प्रदेशको पहिचान स्थापित गर्ने अवसर दिने उनले बताए ।
‘खेल मधेस, जित मधेस’ नारासहित अघि बढेको प्रदेशले आर्थिक वर्ष २०८२/८३ मा अन्य प्रदेशको तुलनामा बढी खेलकुद प्रतियोगिता तथा कार्यक्रम आयोजना गरेको दाबीसमेत गरेको छ ।
प्रतियोगितामा सम्भावना भएका खेलाडीलाई पालिकास्तरबाटै छनोट प्रक्रियामा सहभागी गराउन स्थानीय तहलाई आग्रह गरिएको छ । खेलाडीको मनोबल उच्च राख्न र प्रदेशको प्रतिष्ठासँग जोडिएको प्रतियोगितामा सफल नतिजा हासिल गर्न प्रदेश सरकारले आवश्यक सहयोग गर्नुपर्नेमा पनि पदाधिकारीले जोड दिएका छन् ।
