जनकपुर । नेपाली कांग्रेसका महामन्त्री प्रदीप पौडेलले प्रहरी महानिरीक्षक (आईजीपी) प्रकरणमा प्रधानमन्त्रीका सल्लाहकारको भूमिकालाई लिएर सरकारको नैतिकता र जवाफदेहितामाथि प्रश्न उठाएका छन् ।
शुक्रबार जनकपुरमा आयोजित पत्रकार सम्मेलनमा पौडेलले आफूलाई दोष लाग्न सक्ने सन्देश मेटाएर अरूमाथि आरोप लगाउनुपर्ने आशयको सन्देश प्रधानमन्त्रीका सल्लाहकारले मोबाइलमार्फत पठाएको प्रसंग उल्लेख गर्दै यस्तो गतिविधिमा संलग्न व्यक्तिको नैतिकतामाथि प्रश्न गरेका हुन् ।
विगतमा कुनै प्रधानमन्त्रीका सल्लाहकार यस्तो गतिविधिमा संलग्न भएको भए पदमा रहिरहन सक्थे कि राजीनामा दिनुपर्ने अवस्था आउँथ्यो भन्दै उनले प्रश्न गरे । आईजीपी प्रकरणमा सरकारले लिएको निर्णय र त्यससँग जोडिएका घटनाक्रमबारे प्रधानमन्त्री तथा उनका सल्लाहकारले स्पष्ट जवाफ दिनुपर्ने उनको भनाइ थियो ।
पौडेलले दुई तिहाइको जनमत प्राप्त गर्दैमा सरकारले गरेका सबै निर्णय स्वीकार गर्नुपर्ने र सरकारमाथि प्रश्न उठाउन नपाइने भन्ने नहुने बताए । सरकारका निर्णय, नियुक्ति र छानबिन प्रक्रियाबारे प्रश्न उठाउनु नागरिकको अधिकार भएको उल्लेख गर्दै उनले जवाफदेहिताविहीन कार्यशैलीले लोकतन्त्र कमजोर बनाउने टिप्पणी गरे ।
कांग्रेस सभापति र पार्टीका अन्य नेतामाथि पनि कानुनसम्मत ढंगले छानबिन गर्न आफूहरू तयार रहेको उनले बताए । तर, कसैलाई पक्राउ गर्ने, थुनामा राख्ने वा अनुसन्धान गर्ने नाममा कानुनी प्रक्रिया र न्यायिक मर्यादा उल्लंघन गर्न नहुने उनको भनाइ थियो ।
सरकारले राजनीतिक दल वा तिनका नेतृत्वविरुद्ध प्रतिशोध साँध्नुभन्दा सुशासन कायम गर्ने, बिचौलियाको चलखेल अन्त्य गर्ने र भ्रष्टाचारमा संलग्नलाई कानुनी दायरामा ल्याउनुपर्ने पौडेलले बताए । कांग्रेस आफ्नो सम्पत्तिसमेत छानबिन गर्न तयार रहेको उल्लेख गर्दै उनले गैरकानुनी काम गर्नेलाई कारबाही गर्न सहयोग गर्ने प्रतिबद्धता जनाए ।
सरकारले आफू र आफ्ना जिम्मेवार पदाधिकारीमाथि उठेका प्रश्नको जवाफ दिनुपर्नेमा जोड दिँदै पौडेलले विधिको शासन, लोकतान्त्रिक मूल्य र अभिव्यक्ति स्वतन्त्रताको पक्षमा कांग्रेसले सरकारका गलत काममाथि प्रश्न उठाइरहने बताए ।
