हेटौँडा । छठ पर्व मनाउन हेटौँडास्थित राप्ती नदी किनारमा तयारी अन्तिम चरणमा पुगेको छ । हेटौँडा उपमहानगरपालिका–१ स्थित राप्ती तटमा सरसफाइ, घाट व्यवस्थापन र पण्डाल निर्माणको काम धमाधम भइरहेको छ ।
संयुक्त मधेशी सेवा समाज नेपाल र छठ पूजा समारोह समितिको आयोजनामा हुने पूजाका लागि यस वर्ष ६५ वटा पण्डाल निर्माण गरिएको छ । प्रत्येक पण्डाल २० फिट चौडा र सात सय फिट लामो रहेको संयुक्त मधेशी सेवा समाज नेपाल मकवानपुरका सचिव नन्दलाल दासले जानकारी दिए।
यस वर्ष ५० देखि ६० हजारभन्दा बढी भक्तजन सहभागी हुने आयोजकको अनुमान छ । भक्तजनको बढ्दो चापलाई ध्यानमा राख्दै पण्डालको आकार विस्तार गर्नुका साथै आवागमन र सुरक्षा व्यवस्थापनमा समेत ध्यान दिइएको दासले बताए ।
पूजा स्थलसम्म पैदल पुग्नेले राप्ती रोड प्रयोग गर्न सक्नेछन् भने सवारीसाधनमा आउनेले चौकीटोलस्थित लोकप्रिय होटल चोकबाट तरकारी मण्डी हुँदै छठ घाट पुग्ने मार्ग प्रयोग गर्नुपर्नेछ । उक्त मार्ग निर्माण भइरहेको र सवारीसाधन पार्किङका लागि तरकारी मण्डी पछाडिको फुटबल मैदानमा व्यवस्था मिलाइएको दासले जानकारी दिए ।
चार दिनसम्म मनाइने छठ पर्वको पहिलो दिन शुक्रबार कात्तिक २७ गते व्रतालुले नहाय–खाय विधिबाट पर्व सुरु गर्नेछन् । दोस्रो दिन शनिबार खरना, तेस्रो दिन आइतबार साँझ अस्ताउँदो सूर्यलाई अर्घ्य र चौथो दिन सोमबार बिहान उदाउँदो सूर्यलाई अर्घ्य दिएपछि पर्व समापन हुनेछ ।
