राष्ट्रिय स्वतन्त्र पार्टीका प्रवक्ता जगदीश खरेलले ललितपुरको विकासका लागि सबै पक्ष मिलेर काम गर्नुपर्ने बताएका छन्। उनले जनताको हितलाई पहिलो प्राथमिकतामा राख्दै उद्योग, व्यापार र व्यवसायीका समस्या समाधान गर्न राज्यले स्पष्ट नीति लिनुपर्ने बताएका हुन्।
ललितपुर सुनचाँदी व्यवसायी संघले नेपाल संवत् ११४७ को नववर्ष तथा तिहार २०८३ को अवसरमा आयोजना गरेको शुभकामना आदानप्रदान तथा चियापान कार्यक्रममा बोल्दै खरेलले व्यवसायीका समस्या समाधानका लागि संसद् र सरकार दुवै तहबाट पहल हुनुपर्ने बताए।
उनले संसद्, सरकार, मन्त्रिपरिषद् र सम्बन्धित मन्त्रालयले के–के काम गर्नुपर्ने हो भन्ने विषयमा स्पष्ट प्रस्ताव तयार गर्न सुनचाँदी व्यवसायी संघलाई आग्रह गरे। व्यवसायीका समस्या र आवश्यकताबारे लिखित रूपमा सुझाव तयार गरी सम्बन्धित निकायसम्म पुर्याउनुपर्ने उनको भनाइ थियो। ‘हाम्रो पहिलो प्राथमिकता जनता हुन्। जनताको हित हुनुपर्छ। त्यसपछि व्यवसाय र व्यवसायीको संरक्षण पनि हुनुपर्छ,’ खरेलले भने, ‘यसका लागि संसद्ले के गर्नुपर्छ, सरकारले के गर्नुपर्छ, मन्त्रालय र मन्त्रिपरिषद्ले के गर्नुपर्छ भन्ने कुरा लिखित रूपमा दिनुस्। त्यसलाई अघि बढाउन म पहल गर्छु।’
ललितपुर उद्योग वाणिज्य महासंघ र ललितपुर सुनचाँदी व्यवसायी संघबाट आफूले धेरै अपेक्षा गरेको उल्लेख गर्दै उनले ललितपुरको विकासका लागि एक्लाएक्लै नभई मिलेर काम गर्नुपर्ने बताए। ‘ललितपुर बनाउने हो भने अब तपाईं–हामी नमिली र सँगै काम नगरी सुखै छैन,’ उनले भने।
खरेलले ललितपुरको ऐतिहासिक तथा सांस्कृतिक पहिचान जोगाउने जिम्मेवारी अहिलेको पुस्ताको काँधमा रहेको पनि बताए। पुर्खाहरूले दरबार स्क्वायर, मन्दिर, चोक, पाटी, पौवा, ढुंगेधारालगायतका सम्पदा निर्माण गरेर हस्तान्तरण गरेको उल्लेख गर्दै उनले नयाँ पुस्ताले पनि भावी पुस्ताका लागि केही योगदान गर्नुपर्ने धारणा राखे। ‘हाम्रा पुर्खाहरूले दरबार स्क्वायर बनाए, चोक बनाए, मन्दिर बनाए, पाटी–पौवा बनाए, हाम्रो भेषभूषा र संस्कृति दिए। हामीले चाहिँ भावी पुस्तालाई के दिने? हाम्रा छोराछोरी र नातिनातिनीले पनि हाम्रो पुस्ताको योगदानको कथा गाउन सक्नुपर्छ,’ उनले भने।
ललितपुरको विकास गर्दा यहाँको नेवा सभ्यता, सम्पदा, जीवनशैली र संस्कारलाई पनि उत्तिकै महत्व दिनुपर्ने खरेलको भनाइ थियो। विश्वका विकसित मुलुकहरूले समेत आफ्नो मौलिक संस्कृति र पहिचान जोगाउन प्रयास गरिरहेको अवस्थामा नेपालसँग रहेको नेवा सभ्यता अमूल्य सम्पत्ति भएको उनले बताए।
नेवा सभ्यता र सम्पदा नेवार समुदायको मात्र नभई सम्पूर्ण नेपालीको साझा पहिचान भएको उल्लेख गर्दै उनले यसको संरक्षणमा सबै नेपाली लाग्नुपर्ने बताए। ललितपुरको सांस्कृतिक पहिचान जोगाउनु भनेको नेपालको पहिचान जोगाउनु पनि भएको उनको भनाइ थियो।
