काठमाडौँ । नेपाल विद्युत् प्राधिकरणले काठमाडौँका विभिन्न स्थानमा आठ दिनसम्म विद्युत् आपूर्ति बन्द गर्ने भएको छ। कुलेश्वर र बानेश्वर वितरण केन्द्रअन्तर्गतका विद्युत् लाइन भूमिगत गर्ने कार्यका लागि कात्तिक १३ गतेदेखि २० गतेसम्म दैनिक साढे पाँच घण्टा विद्युत् कटौती गर्न लागिएको हो।
प्राधिकरणका अनुसार सम्बन्धित क्षेत्रमा बिहान १०:३० बजेदेखि अपराह्न ४ बजेसम्म विद्युत् सेवा अवरुद्ध हुनेछ।
प्राधिकरणले सार्वजनिक गरेको सूचनाअनुसार कात्तिक १३ गते बलम्बु, थानकोट र मातातीर्थ फिडरअन्तर्गत हाई भिजन कोलोनी क्षेत्रमा विद्युत् आपूर्ति बन्द हुनेछ। कात्तिक १४ गते सीतापाइला फिडरअन्तर्गत कलंकी रिङरोडदेखि स्युचाटार सबस्टेसनसम्मको क्षेत्रमा विद्युत् सेवा प्रभावित हुनेछ।
त्यस्तै, कात्तिक १५ गते कलंकी, थानकोट र रोपवे फिडरअन्तर्गत कलंकी चोकदेखि ढुंगेअड्डासम्म विद्युत् कटौती हुनेछ। कात्तिक १६ गते बाफल फिडरअन्तर्गत कलंकी रिङरोडदेखि स्युचाटार सबस्टेसनसम्मको क्षेत्रमा विद्युत् आपूर्ति बन्द रहनेछ।
यसैगरी, कात्तिक १७ गते शंखमूल फिडरअन्तर्गत यूएन पार्कदेखि बिजुली बजारसम्म, कात्तिक १८ गते सतुंगल फिडरअन्तर्गत धौलागिरि आवास तथा मातातीर्थ पीएसएस क्षेत्रमा विद्युत् अवरुद्ध हुनेछ।
कात्तिक १९ गते स्युचाटार एसएस फिडरअन्तर्गत हाज्मा पुल क्षेत्रमा विद्युत् कटौती गरिनेछ भने कात्तिक २० गते पुनः सतुंगल फिडरअन्तर्गत धौलागिरि आवास तथा मातातीर्थ पीएसएस क्षेत्रमा विद्युत् आपूर्ति बन्द हुने प्राधिकरणले जनाएको छ।
प्राधिकरणले तोकिएको समयमा काम सम्पन्न गरी निर्धारित समयमै विद्युत् सेवा नियमित गर्ने जनाएको छ।
