काठमाडौं । एसियन पेन्ट्स अन्तरविद्यालय यु–१८ छात्र तथा छात्रा राष्ट्रिय फुटबल च्याम्पियनसिपको उपाधि बागमती प्रदेशको मनकामना स्कुल र मधेस प्रदेशको जनज्योति सेकेन्डरी स्कुलले जितेका छन्।
त्रिपुरेश्वरस्थित दशरथ रंगशालामा सोमबार भएको फाइनलमा जनज्योतिले छात्रातर्फ सुदूरपश्चिमको श्री जीवनज्योति माध्यमिक विद्यालयलाई ७–२ गोलले हराउँदै उपाधि जित्यो। जनज्योतिका लागि अनिता रानामगरले ह्याट्रिक गरिन्। विजेता राईले दुई तथा दीक्षा रानापाल र रकिशा दंगालले एक–एक गोल गरे। जीवनज्योतिकी बिबिशा बिष्टले दुई गोल फर्काइन्।
छात्रतर्फको फाइनलमा मनकामना स्कुलले गण्डकी प्रदेशको गुरुकुल विद्यासदनलाई २–० गोलले पराजित गर्दै उपाधि जित्यो। खेल सकिन एक मिनेट बाँकी छँदा दुई गोल गरेपछि मनकामनाले उपाधि आफ्नो पक्षमा पारेको हो।
प्रतियोगितामा देशभरका ३२७ विद्यालयले जिल्ला तथा प्रदेशस्तरीय छनोट पार गर्दै प्रतिस्पर्धा गरेका थिए। च्याम्पियन दुवै टोलीले एक लाख रुपैयाँ र उपविजेताले ५० हजार रुपैयाँसहित ट्रफी प्राप्त गरे।
विजेता तथा उपविजेता टोलीलाई राष्ट्रिय खेलकुद परिषद्का सदस्यसचिव रामचरित्र मेहता, नेपाली राष्ट्रिय फुटबल टोलीका कप्तान किरण चेम्जोङ र महिला राष्ट्रिय टोलीकी पूर्वकप्तान अञ्जिला तुम्बाप्पो सुब्बालगायतले पुरस्कार वितरण गरे।
