काठमाडौं । नेपाल प्रहरीले आगामी चाडपर्वलाई लक्षित गर्दै प्रमुख नाकामा ‘नागरिक यात्रु सहायता कक्ष’ स्थापना गर्ने भएको छ। यात्रु ठगी र सवारी दुर्घटना न्यूनीकरणका लागि सहायता कक्ष सञ्चालन गर्न लागिएको प्रहरीले जनाएको छ।
सोमबार प्रतिनिधिसभाको पूर्वाधार विकास समितिमा प्रहरी नायब उपरीक्षक (डीएसपी) सुनिलजंग शाहले बढी भाडा असुल्ने, टिकटबिना यात्रु बोक्ने र एउटै सिटको टिकट धेरै जनालाई बिक्री गर्ने जस्ता गतिविधिमा निगरानी बढाइने बताए।
उनका अनुसार सहायता कक्षमा नेपाल प्रहरी र ट्राफिक प्रहरीको उपस्थिति रहनेछ। भाडादरसम्बन्धी विवाद तत्काल समाधान गर्न यातायात व्यवस्था विभागका प्रतिनिधिलाई समेत सहभागी गराउने प्रस्ताव गरिएको छ। सबै गन्तव्यको भाडादर स्पष्ट रूपमा राखिने र टिकट काट्ने कर्मचारीको परिचयपत्र अनिवार्य गरिने उनले बताए।
सवारी दुर्घटना न्यूनीकरणका लागि ‘क्यू–फ्री’ प्रणालीमा समेत सुधार आवश्यक रहेको शाहले बताए। सम्बन्धित रुटमा नियमित चल्ने चालकलाई सोही रुटमा खटाउँदा सडकको अवस्था, घुम्ती र जोखिमयुक्त स्थानबारे जानकारी हुने भएकाले दुर्घटनाको जोखिम घट्ने उनको भनाइ छ।
दशैँका बेला बढी सवारी चाप हुने कलंकी–नागढुंगा खण्डमा विशेष ट्राफिक व्यवस्थापन गरिने प्रहरीले जनाएको छ। चाडपर्वको चार दिनअघिदेखि बढ्ने सवारी चाप व्यवस्थापन गर्न उपलब्ध जनशक्तिलाई अधिकतम परिचालन गरिने शाहले बताए।
