काठमाडौं। गृहमन्त्री सुधन गुरुङले नयाँ पुस्ता राजनीतिमा पुरानो शैली सिक्न नभई त्यसलाई परिवर्तन गर्न आएको बताएका छन् । जेन–जी शहीद दिवसका अवसरमा जेन–जी शहीद कल्याणकारी समाजले आयोजना गरेको कार्यक्रममा उनले नयाँ पुस्ताको सरकारले जनतालाई शासन गर्ने नभई सेवा गर्ने राजनीतिक संस्कार विकास गर्ने बताए ।
‘हाम्रो भविष्य हामी आफैं कोर्ने वाला छौं, अरुलाई कोर्न दिने वाला छैनौं,’ उनले भने, ‘राजनीति हामी सिकाउन आएको, सिक्न आएको होइन ।’
उनले पुरानो पुस्ताले जनतामाथि शासन गर्ने संस्कार बसालेको आरोप लगाउँदै नयाँ पुस्ताले सेवामुखी राजनीति स्थापित गर्ने बताए । आफूहरू टीका लगाएर नभई निर्वाचनबाट दुईतिहाइ बहुमतसहित सरकारमा आएको उनको दाबी थियो ।
‘हामी त्यही संस्कार परिवर्तन गर्न आएको, तपाईंको संस्कार भएन भनेर हामी आएको,’ उनले भने, ‘हामी लड्न आएको र यत्तिकै हामीलाई टीका लगाएर हामी आएको होइन । चुनाव लडेर, जितेर तपाईंहरूलाई दुई तिहाइको बहुमत ल्याएर देखाएर आएको सरकार हो ।’
पुराना राजनीतिक दलका नेताहरूलाई नयाँ पुस्तालाई राजनीति, संस्कार र सरकार सञ्चालन सिकाउन नखोज्न आग्रह गर्दै गुरुङले आफूहरूको बोली, शैली वा काम गर्ने तरिका कतिपयलाई असहज लागे पनि गलत काम नगर्ने बताए । नयाँ पुस्ताको सरकार पुरानो राजनीतिक संस्कार भत्काउन आएको उनको भनाइ थियो ।
उनले वर्तमान सरकार तीन करोड नेपालीको आशा भएको दाबी गर्दै यसको उद्देश्य पछाडि फर्किने नभई नयाँ नेपाल निर्माणतर्फ अघि बढ्ने रहेको बताए । नेपाललाई स्वीट्जरल्याण्ड वा सिंगापुर बनाउनेभन्दा आफ्नै पहिचानसहितको नेपाल निर्माण गर्ने सरकारको लक्ष्य रहेको उनले बताए ।
सरकारको कामप्रति विश्वास गर्न नागरिकलाई आग्रह गर्दै उनले नयाँ पुस्ताले देशको भविष्य आफैं निर्माण गर्ने बताए ।
