काठमाडौं– नेपालको विनाशकारी बाढीपछि जारी उद्धार तथा पुनर्निर्माण अभियानका लागि अमेरिकी प्रविधि कम्पनी एनभिडियाका संस्थापक तथा प्रमुख कार्यकारी अधिकृत (सीईओ) जेन्सेन हुआङले १ करोड अमेरिकी डलर सहयोग गरेका छन्।
अर्थमन्त्री डा. स्वर्णिम वाग्लेले भिडियो सन्देशमार्फत हुआङले प्रधानमन्त्री दैवी प्रकोप उद्धार कोषमा उक्त रकम प्रदान गरेको जानकारी दिएका हुन्। १ करोड अमेरिकी डलरको यो रकम नेपाली रुपैयाँमा करिब १ अर्ब ५० करोड रुपैयाँभन्दा बढी हुन्छ।
अर्थमन्त्री वाग्लेका अनुसार उक्त सहयोग रसुवाको भोटेकोशी जलाधार क्षेत्रसहित बाढीबाट प्रभावित विभिन्न क्षेत्रमा उद्धार, राहत तथा पुनर्निर्माणका लागि उपलब्ध गराइएको हो।
वाग्लेले हुआङको सहयोगप्रति नेपाल सरकारका तर्फबाट आभार व्यक्त गर्दै यसले अन्य व्यक्ति तथा संस्थालाई समेत विपद्का बेला सहयोग गर्न प्रेरित गर्ने विश्वास व्यक्त गरेका छन्।
यो सहयोग बाढी–पहिरो प्रभावितका लागि कुनै बहुराष्ट्रिय कम्पनी वा व्यक्तिबाट प्राप्त हालसम्मकै ठूलो सहयोगमध्ये एक भएको जनाइएको छ।
एनभिडिया संस्थापकको सहयोगसँगै प्रधानमन्त्री दैवी प्रकोप उद्धार कोषमा संकलित रकम १० अर्ब रुपैयाँभन्दा बढी पुगेको अर्थमन्त्री वाग्लेले बताएका छन्।
कोषमा संकलित रकम रसुवा, नुवाकोट, धादिङलगायत बाढी प्रभावित जिल्लामा तत्कालीन राहत, विस्थापितको पुनर्स्थापना तथा क्षतिग्रस्त पूर्वाधारको पुनर्निर्माणमा प्रयोग गरिने जनाइएको छ।
