सिन्धुपाल्चोक (चौतारा) । रसुवामा आएको विनाशकारी बाढीका कारण चीनतर्फ फसेका ११४ जना नेपाली बिहीबार तातोपानी नाका हुँदै स्वदेश फर्किएका छन्।
चीनतर्फ फसेका १४७ नेपालीमध्ये ११४ जनालाई चिनियाँ पक्षले सुरक्षित रूपमा तातोपानी नाकाको लिपिङ क्षेत्रमा ल्याई नेपाली अधिकारीको जिम्मा लगाएको हो।
सिन्धुपाल्चोकका प्रमुख जिल्ला अधिकारी शशिधर घिमिरेका अनुसार नेपाल फर्किएका ११४ जनामध्ये ११३ जना रसुवाका र एक जना काठमाडौंका नागरिक छन्।
चिनियाँ पक्षले स्वदेश फर्काइएका नेपालीको राहदानी नम्बरलगायत आवश्यक विवरणसमेत नेपाली अधिकारीलाई उपलब्ध गराएको घिमिरेले जानकारी दिए।
उनका अनुसार नेपाल आइपुगेका नागरिकको आवश्यक प्रक्रिया पूरा गरी काठमाडौं लैजाने तयारी भइरहेको छ।
रसुवामा आएको बाढीबाट ठूलो संख्यामा नेपाली तथा विदेशी नागरिक प्रभावित भएका छन्। बाढीपछि चीनतर्फ फसेका नेपालीलाई सुरक्षित रूपमा स्वदेश फर्काउने प्रयास जारी रहेको प्रशासनले जनाएको छ।
