काठमाडौं। राष्ट्रिय स्वतन्त्र पार्टीका सांसद दीपकराज बोहराले त्रिशूली–३ ए जलविद्युत् आयोजनाको सुरुङमा फसेका नागरिकको अवस्था र उद्धारको प्रगतिबारे संसद्लाई जानकारी गराउन सरकारसँग माग गरेका छन्।
बिहीबार प्रतिनिधिसभाको बैठकमा बोल्दै बोहराले सुरुङमा फसेका नागरिकको उद्धार गर्न सरकार सक्षम छ कि छैन भन्ने प्रश्नसमेत उठाए। ‘त्यो सुरुङमा मान्छे जीवित छन् कि छैनन् । कसले भनिदिने हो खासमा ?’ उनले भने।
उद्धारका लागि विदेशी सहयोग आवश्यक भए त्यसबारे पनि सरकारले स्पष्ट पार्नुपर्ने उनको भनाइ थियो। ‘सरकारले बताइदिनुपर्यो सभामुख महोदय,’ उनले भने।
बोहराले भविष्यमा हिमताल फुटेर हुने बाढीको क्षति न्यूनीकरणका लागि जोखिमयुक्त हिमतालको एआई प्रविधिमार्फत निगरानी गर्न पनि सरकारको ध्यानाकर्षण गराए। जोखिमयुक्त क्षेत्रमा एआईयुक्त क्यामेरा जडान गरी ताल वा पहाडमा हुने हलचलको सूचना तत्काल प्राप्त गर्ने व्यवस्था गर्नुपर्ने उनले बताए।
उनले बाढी प्रभावित क्षेत्रमा खोज, उद्धार र राहत वितरणलाई थप प्रभावकारी बनाउन पनि सरकारसँग माग गरे।
