काठमाडौं। रसुवा बाढीमा सुरुङभित्र फसेका इन्जिनियर तथा प्राविधिकको उद्धारमा ढिलाइ भएको भन्दै नेपाल इन्जिनियर्स एसोसिएसनले सरकारप्रति आक्रोश व्यक्त गरेको छ। एसोसिएसनले राज्यको सम्पूर्ण संयन्त्र परिचालन गरेर वा आवश्यक परे बाहिरबाट जनशक्ति ल्याएर भए पनि सुरुङमा फसेका तथा सम्पर्कविहीनको तत्काल उद्धार गर्न माग गरेको छ।
सोमबार ललितपुरमा आयोजित पत्रकार सम्मेलनमा एसोसिएसनका अध्यक्ष सुवासचन्द्र बरालले बाढी आएको पहिलो दिनदेखि नै सरकारका सम्बन्धित निकायसँग समन्वय गर्दै आए पनि उद्धार अपेक्षित गतिमा अघि बढ्न नसकेको बताए।
‘उद्धारमा सरकार चुक्यो जस्तो लाग्छ। अब समय ढल्किसकेको छ,’ बरालले भने।
उनका अनुसार राष्ट्रिय विपद् जोखिम न्यूनीकरण तथा व्यवस्थापन प्राधिकरण, भौतिक पूर्वाधार तथा यातायात मन्त्रालय, प्रधानमन्त्रीको कार्यालय, नेपाल विद्युत् प्राधिकरण, निजी जलविद्युत् आयोजना र स्वतन्त्र ऊर्जा उत्पादकहरूको संस्था, नेपाल (इप्पान) लगायतलाई सम्पर्कविहीनको उद्धारका लागि तत्काल पहल गर्न ध्यानाकर्षण गराइएको थियो।
एसोसिएसनले सरकारसँग सहकार्यका लागि आफूहरूले निरन्तर पहल गरे पनि निजी क्षेत्रका विशेषज्ञ तथा उपलब्ध उपकरणसमेत प्रभावकारी रूपमा परिचालन हुन नसकेको जनाएको छ। सयौँ मानिस लामो समयदेखि सम्पर्कविहीन रहेकाले दबाबमूलक अभियान सुरु गर्नुपरेको बरालले बताए।
एसोसिएसनका अनुसार रसुवा बाढीपछि विभिन्न जलविद्युत् आयोजनाका सुरुङमा कार्यरत ९१० जना प्राविधिक तथा गैरप्राविधिक कर्मचारी सम्पर्कविहीन छन्। तीमध्ये १८८ जना इन्जिनियर रहेको एसोसिएसनको दाबी छ।
सम्पर्कविहीन इन्जिनियरमध्ये अपर त्रिशूलीमा ६०, लाङटाङमा २०, रसुवागढी हाइड्रोमा २५, मेलुङमा ६ र त्रिशूली ‘ए’मा ३० जना रहेको एसोसिएसनले जनाएको छ।
बाढीपछि केही इन्जिनियरको सकुशल उद्धार भए पनि केही अझै सुरुङभित्र जीवन–मरणको दोसाँधमा रहेको भन्दै एसोसिएसनले उद्धारमा ढिलाइ नगर्न सरकारलाई आग्रह गरेको छ।
