काठमाडौं । चीन सरकारले नेपालका बाढीपीडितका लागि घोषणा गरेको २० लाख अमेरिकी डलर अर्थात् करिब साढे ३० करोड रुपैयाँ बराबरको नगद सहयोग हस्तान्तरण गरेको छ।
आइतबार अर्थ मन्त्रालयमा अर्थमन्त्री डा. स्वर्णिम वाग्लेसँग भेट गर्दै नेपालका लागि चिनियाँ राजदूत झाङ माओमिङले उक्त रकमको चेक हस्तान्तरण गरेका हुन्।
यसै क्रममा राजदूत माओमिङले चिनियाँ रेडक्रसको तर्फबाट थप २ लाख अमेरिकी डलर अर्थात् करिब ३ करोड ६ लाख रुपैयाँ बराबरको नगद सहयोगसमेत हस्तान्तरण गरे।
सहयोग हस्तान्तरण गर्दै राजदूत माओमिङले हिमालय क्षेत्रमा आएको ठूलो विपत्तिको सामना नेपाल र चीनले मिलेर गर्ने बताए। उनले नेपालमा आएको विपत्तिप्रति चीन सधैँ साथमा रहेको सन्देश चिनियाँ राष्ट्रपति र प्रधानमन्त्रीले नेपाल सरकारलाई पठाएको जानकारी दिए।
उनका अनुसार चीन सरकारले उपलब्ध गराएका अन्य राहत तथा उद्धार सामग्री पनि नेपाल भित्रिन थालेका छन्। आइतबार मात्रै दुईवटा चिनियाँ जहाजमार्फत ५० टन टेन्ट, ब्ल्याङ्केट, स्लिपिङ ब्याग, मेडिकल किट र बिस्कुटलगायत सामग्री काठमाडौं ल्याइएको छ।
राजदूत माओमिङले थप राहत सामग्री र सहयोग निरन्तर उपलब्ध गराउने प्रतिबद्धता पनि जनाए।
यस्तै, जलविद्युत् आयोजनाको सुरुङमा फसेकाहरूको उद्धारका लागि चिनियाँ हेलिकप्टरसहित दक्ष जनशक्ति नेपाल आइसकेको उनले बताए। थप केही उद्धार प्राविधिकसमेत आइतबार नेपाल आइपुगेको जानकारी उनले अर्थमन्त्रीलाई दिए।
नेपाल सरकारले उद्धारका लागि माग गरेको ठूलो परिमाणमा सामग्री बोक्न सक्ने ड्रोन नेपाल ल्याउन चीन सरकारले तीव्र गतिमा काम गरिरहेको जानकारीसमेत राजदूत माओमिङले दिए।
