काठमाडौं। रसुवा बाढीबाट सिर्जित विपद्को सामना गर्न नेपाली काँग्रेसले सरकारसँग समन्वय र सर्वदलीय सहकार्यलाई प्राथमिकता दिँदै आफ्नो सक्रियता बढाएको छ। विपद् व्यवस्थापनमा पार्टीको भूमिका र आगामी कार्ययोजनाबारे आइतबार पार्टी केन्द्रीय कार्यालय सानेपामा बसेको बैठकले संसद्भित्र साझा संयन्त्र निर्माण गर्ने तयारी अघि बढाएको हो।
सभापति गगनकुमार थापाका अनुसार राष्ट्रिय स्वतन्त्र पार्टीले आयोजना गरेको सर्वदलीय बैठकपछि विपद् व्यवस्थापनका लागि संसद्भित्र साझा संयन्त्र बनाउने समझदारी भएको छ। उक्त संयन्त्रलाई पूर्णता दिएर तत्काल काम अघि बढाउन रास्वपा सभापतिसँग थप छलफल गरिने उनले बताए।
काँग्रेसले प्रभावित क्षेत्रमा उद्धार, राहत र समन्वयका लागि पार्टीको टोलीसमेत परिचालन गरेको छ। संसदीय दलका नेता भीष्मराज आङ्देम्बे र प्रमुख सचेतकसहितको टोलीले नुवाकोटका प्रभावित क्षेत्रको स्थलगत अवलोकन गरी प्रधानमन्त्रीलाई नौबुँदे ध्यानाकर्षण पत्र बुझाइसकेको छ। केन्द्रीय सदस्य मोहन आचार्यको संयोजकत्वमा गठित विपद् समन्वय समितिले रसुवालगायतका प्रभावित क्षेत्रमा समन्वय गरिरहेको पार्टीले जनाएको छ।
सभापति थापाले विपद्को समयमा सरकारको नेतृत्वमा सहयोग गर्ने पार्टीको नीति रहेको भन्दै प्रधानमन्त्री राहत कोषमा सहयोग गर्ने घोषणा गरे। पार्टीका केन्द्रीय सदस्य, सांसद तथा देशभरका निर्वाचित जनप्रतिनिधिबाट स्वेच्छिक रूपमा संकलन हुने रकम पार्टीको कोषमार्फत एकमुष्ट रूपमा राहत कोषमा जम्मा गरिने उनले बताए। राहत वितरणमा दोहोरोपन नहोस् भनेर यस्तो व्यवस्था गरिएको काँग्रेसले जनाएको छ।
बैठकमा रसुवा, नुवाकोट र धादिङका स्थानीय नेता तथा नेपाल तरुण दलका प्रतिनिधिले प्रभावित क्षेत्रको अवस्था र राहतमा देखिएका अभावबारे जानकारी गराएका थिए। काँग्रेसले विपद्को समयमा सरकारसँग निरन्तर समन्वय गरी आवश्यक सहयोग गर्ने प्रतिबद्धता जनाएको छ।
