जनकपुर। नेपाली कम्युनिष्ट पार्टीका सह–संयोजक एवं पूर्वप्रधानमन्त्री माधवकुमार नेपालले प्राकृतिक विपद्बाट प्रभावितको उद्धार, खोजी र राहतलाई प्रभावकारी बनाउन सरकारसँग आग्रह गरेका छन्। उनले विपद् प्रभावितको सहयोगका लागि आफ्नो पार्टीका तर्फबाट २५ लाख रुपैयाँ राहत कोषमा उपलब्ध गराउने घोषणा पनि गरे।
आइतबार जनकपुरमा आयोजित कार्यक्रममा बोल्दै नेपालले बाढीपहिरोबाट भएको मानवीय तथा भौतिक क्षतिप्रति दुःख व्यक्त गर्दै बेपत्ताको खोजी र मृतकको पहिचानमा सरकारले विशेष सक्रियता देखाउनुपर्ने बताए।
‘बेपत्ताको खोजी र शवको पहिचानका लागि सरकारले विशेष सक्रियता देखाउनुपर्छ,’ उनले भने।
उनका अनुसार बाढीपहिरोबाट धेरै परिवार शोकमा परेका छन् भने कतिपय विस्थापित भएका छन्। पार्टीका नेता, मन्त्री, सांसद तथा स्थानीय तहका जनप्रतिनिधिलाई उद्धार तथा राहतमा सक्रिय हुन निर्देशन दिइएको उनले बताए। राहत रकम संकलनका लागि पार्टीका तर्फबाट विभिन्न तहमा पहल भइरहेको उनले जानकारी दिए।
नेपालले संकटको समयमा सरकारको आलोचनाभन्दा रचनात्मक सुझाव र सहकार्य आवश्यक रहेको बताए। भविष्यमा यस्ता विपद्बाट गाउँबस्तीलाई जोगाउन दीर्घकालीन योजना बनाएर अघि बढ्नुपर्ने उनको भनाइ छ।
