काठमाडौं । कोशी प्रदेशका सचिव कोषहरि निरौलालाई संघीय सरकारले रसुवाको टिमुरेमा शव व्यवस्थापनको जिम्मेवारीसहित काजमा खटाएको छ।
भूमि व्यवस्था, सहकारी तथा गरिबी निवारण मन्त्रालय र संघीय मामिला तथा सामान्य प्रशासन मन्त्रालयको समन्वयमा मन्त्रीस्तरीय निर्णयबाट निरौलालाई टिमुरे पठाउने निर्णय गरिएको हो।
निरौलाले शनिबार सामाजिक सञ्जाल फेसबुकमार्फत बाढीमा फेला परेका शवको व्यवस्थापनमा हतार नगर्न सरकारलाई सुझाव दिएका थिए। मोरङका प्रमुख जिल्ला अधिकारी हुँदा कोभिड–१९ महामारीका क्रममा शव व्यवस्थापनमा आफूले भोगेको अनुभव उल्लेख गर्दै उनले मृतकको पहिचान र आफन्तको खोजीलाई प्राथमिकता दिनुपर्ने बताएका थिए।
उनले मृतकको धर्म, परम्परा, रीतिरिवाज र संस्कारअनुसार अन्तिम संस्कार गर्न पाउने अधिकार सुनिश्चित गर्नुपर्ने धारणा राखेका थिए। पहिचान नखुलेका शवलाई तत्काल गाड्दा आफन्तले आफ्ना परिवारका सदस्यको पहिचान गर्ने अवसर गुमाउन सक्ने उनको भनाइ थियो।
निरौलाले शव केही समय सुरक्षित राख्न आवश्यक व्यवस्था मिलाउन सकिने भन्दै ‘लासलाई अन्याय नगरौँ र आफन्तको भावनामा कुठाराघात पनि नगरौँ’ भन्ने आग्रह गरेका थिए।
उनले उक्त फेसबुक स्टाटस पछि हटाएका छन्। त्यसको भोलिपल्टै उनलाई रसुवाको टिमुरेमा शव व्यवस्थापनकै जिम्मेवारी दिएर काजमा खटाइएपछि निर्णयलाई चासोका साथ हेरिएको छ।
