काठमाडौं । भोटेकोशी नदीमा १० भदौमा आएको विनाशकारी बाढीबाट प्रभावितको उद्धार तथा राहतका लागि एसियाली विकास बैंक (एडीबी)ले ५० लाख अमेरिकी डलर अर्थात् करिब ७६ करोड रुपैयाँ आपतकालीन सहायता अनुदान उपलब्ध गराउने भएको छ ।
एडीबीका अनुसार उक्त रकम तत्काल उद्धार, राहत तथा अत्यावश्यक सेवा सञ्चालनमा खर्च गरिनेछ ।
एडीबी अध्यक्ष मासातो कान्दाले विपद्को समयमा नेपाललाई सहयोग गर्ने प्रतिबद्धताअनुसार अनुदान उपलब्ध गराउन लागिएको बताएका छन् । उनका अनुसार बाढीबाट नदी किनारका परिवारले आफ्ना प्रियजन, घर तथा समुदायका आधारभूत सेवा गुमाएका छन् ।
‘क्षति निकै विनाशकारी छ र यसको पूर्ण विवरण आउन अझै बाँकी छ । तर, सहयोगका लागि पर्खन सकिँदैन,’ अध्यक्ष कान्दाले भनेका छन्, ‘यो अनुदानले पीडितलाई तत्काल खाद्यान्न, स्वच्छ खानेपानी, अस्थायी आवास, औषधि र अन्य अत्यावश्यक सामग्री उपलब्ध गराउन सहयोग गर्नेछ ।’
बुधबार आएको बाढीबाट रसुवा, नुवाकोट र धादिङमा ठूलो जनधनको क्षति भएको छ । हालसम्म ५ सय ५३ जनाको शव फेला परेको छ भने हजारौं मानिस सम्पर्कविहीन भएको अनुमान गरिएको छ ।
एडीबीले ‘एसिया प्यासिफिक डिजास्टर रेस्पोन्स फन्ड’बाट अनुदान उपलब्ध गराउन लागेको हो । उक्त रकम खोज तथा उद्धारका उपकरण खरिद, औषधि तथा स्वास्थ्य सामग्री, खाद्यान्न वितरण, स्वच्छ खानेपानी र अस्थायी आवास, सरसफाइ तथा स्वच्छता सामग्रीमा खर्च गरिनेछ ।
त्यस्तै, बाढीबाट थुप्रिएको भग्नावशेष हटाउने, आपतकालीन अस्थायी पुनर्स्थापना, व्यवस्थापन तथा ढुवानीलगायतका कार्यमा समेत अनुदान प्रयोग गरिने एडीबीले जनाएको छ ।
भविष्यमा हुने पुनर्निर्माणका लागि पनि एडीबीले थप सहयोगको तयारी गरिरहेको छ । बैंकले विपद्पछिको आवश्यकता आकलन, पुनर्स्थापना योजना तथा पुनर्निर्माणका लागि आवश्यक लगानीको पूर्वतयारी गर्न विपद् प्रतिकार्य कोषको दोस्रो विन्डोमार्फत थप १ लाख ५० हजार अमेरिकी डलरसम्मको सहायता प्रक्रिया अघि बढाएको जनाएको छ ।
एडीबीले नेपाल सरकार, राष्ट्रिय विपद् जोखिम न्यूनीकरण तथा व्यवस्थापन प्राधिकरण, संयुक्त राष्ट्रसंघीय निकाय तथा अन्य विकास साझेदारसँग समन्वय गरेर काम गरिरहेको जनाएको छ।
