काठमाडौँ । झापा शिवसताक्षी नगरपालिका–१० माईधार घर भई हाल काठमाडौँ महानगरपालिका–२६ मित्रनगर बस्दै आएका नवीन रायालाई अपहरण गरी बन्धक बनाएर १८ लाख रुपैयाँ फिरौती मागेको आरोपमा प्रहरीले सात जनालाई पक्राउ गरेको छ।
काठमाडौँ उपत्यका अपराध अनुसन्धान कार्यालय, टेकुको विशेष टोलीले घटनाबारे सूचना पाएलगत्तै परिचालन भएर रायाको सकुशल उद्धार गर्नुका साथै घटनामा संलग्न सातै जनालाई पक्राउ गरेको हो।
प्रहरीका अनुसार गत साउन २८ गते अपरिचित ५–६ जनाको समूहले रायालाई अपहरण गरी बन्धक बनाएको थियो। उनीमाथि कुटपिट गर्नुका साथै परिवारसँग १८ लाख रुपैयाँ फिरौती माग गरिएको गोप्य सूचना प्रहरीले प्राप्त गरेको थियो।
सूचना प्राप्त भएपछि खटिएको विशेष प्रहरी टोलीले सोही दिन साँझ ६ः३० बजे काठमाडौँको नागार्जुन नगरपालिका–५, छगडोलबाट रायालाई सकुशल उद्धार गरेको हो। उद्धारका क्रममा घटनास्थल आसपासबाट अपहरणमा संलग्न सातै जनालाई नियन्त्रणमा लिइएको प्रहरीले जनाएको छ।
पक्राउ पर्नेमा रामेछाप लिखु तामाकोसी गाउँपालिका–३ का ३२ वर्षीय मनोज बुढाथोकी, मकवानपुर बागमती गाउँपालिका–५ फापरबारीका २० वर्षीय निशान रुम्बा तामाङ, सर्लाही लालबन्दी नगरपालिका–४ का २२ वर्षीय जेनिश चौधरी, ओखलढुङ्गा लिखु गाउँपालिका–५ का २४ वर्षीय निमेश कार्की, चितवन राप्ती नगरपालिका–२ का २४ वर्षीय अमित ओली, अर्घाखाँची मालारानी गाउँपालिका–३ का २२ वर्षीय प्रदिप पोखरेल र काभ्रेपलान्चोक भुम्लु गाउँपालिका–८ का २३ वर्षीय देवकुमार श्रेष्ठ रहेका छन्।
पक्राउ परेका सबैविरुद्ध अपहरण तथा शरीर बन्धकसम्बन्धी कसुरमा अनुसन्धान भइरहेको छ। काठमाडौँ जिल्ला अदालतबाट ६ दिनको म्याद थप गरी उनीहरूलाई हिरासतमा राखिएको र घटनाबारे थप अनुसन्धान तथा कानुनी कारबाही अघि बढाइएको प्रहरी उपरीक्षक तथा सूचना अधिकारी रामेश्वर कार्कीले जानकारी दिएका छन्।
