काठमाडौं। नेपाली कम्युनिस्ट पार्टीका नेता तथा पूर्वमन्त्री वर्षमान पुनले पछिल्ला घटनाक्रमपछि सामाजिक सद्भाव र राष्ट्रिय एकता जोगाउन प्रधानमन्त्रीले तत्काल सर्वदलीय बैठक बोलाउनुपर्ने बताएका छन्।
संघीय संसद् भवनबाहिर बिहीबार सञ्चारकर्मीसँग कुरा गर्दै उनले यस्ता संवेदनशील विषयमा प्रधानमन्त्रीले अभिभावकीय भूमिका निर्वाह गर्नुपर्ने र गृहमन्त्रीले संसद्मा उठेका प्रश्नको चित्तबुझ्दो जवाफ दिनुपर्ने बताए।
“कुनै पनि जाति वा सम्प्रदायले सामाजिक सद्भाव खलबलिने गतिविधि गर्नु हुँदैन,” उनले भने।
पुनले सामाजिक सद्भाव कुनै दल वा समुदाय विशेषको नभई राष्ट्रिय सरोकारको विषय भएको उल्लेख गरे। सुरक्षा संयन्त्रको कमजोरी औंल्याउँदै पूर्वमन्त्री पुनले समस्या समाधानका लागि प्रशासनिक बल प्रयोग वा सेना परिचालन गर्नुभन्दा पहिले राजनीतिक संवाद, स्थानीय सरकारको समन्वय र सामाजिक संघसंस्थाको परिचालन गर्नुपर्नेमा जोड दिए।
सशस्त्र प्रहरी बलले तीन वर्षअघि नै यस्ता घटना हुन सक्ने प्रक्षेपणसहितको प्रतिवेदन दिए पनि गृह प्रशासनले आवश्यक पूर्वतयारी र सतर्कता अपनाउन नसकेको भन्दै उनले असन्तुष्टि जनाए।
पछिल्ला हिंसात्मक घटना र गोली प्रहारको सत्यतथ्य सार्वजनिक गर्न उच्चस्तरीय छानबिन आयोग गठन गर्न पनि उनले माग गरे।
