काठमाडौं । नेपाली कांग्रेसका सभापति गगनकुमार थापाले एउटै पदमा धेरै जना उम्मेदवार हुँदा पार्टीमा लामो समय योगदान गरेका महत्वपूर्ण नेताहरू पराजित भएर केन्द्रीय कमिटीबाहिर रहने अवस्था आउन सक्ने भन्दै उम्मेदवारीबारे पुनर्विचार गर्न आग्रह गरेका छन्।
मंगलबार सभापति पदमा मनोनयन दर्तापछि सञ्चारकर्मीसँग कुरा गर्दै थापाले सबैलाई समेटेर अघि बढ्ने नेतृत्वको जिम्मेवारी भएकाले धेरै जना पदाधिकारी बन्ने प्रयास नगर्न आग्रह गरेका हुन्। उनले भने, ‘मलाई एकदमै चिन्ता लागिरहेको छ ।’
थापाले स्थानीय तहमा मेयर, उपमेयर वा प्रदेश सांसद बन्न चाहनेलाई केन्द्रीय सदस्यमा प्रतिस्पर्धा नगर्न सुझाव दिए। निर्वाचनमा पराजित हुँदा राजनीतिक सम्भावनामा समेत असर पर्न सक्ने भन्दै उनले उम्मेदवारीबारे गम्भीर भएर निर्णय लिन आग्रह गरे।
पार्टी संरचनामा जिल्ला र पालिकालाई समेत अधिकार सम्पन्न बनाइएको उल्लेख गर्दै थापाले प्रदेश र जिल्लामा बसेर पनि महत्वपूर्ण भूमिका निर्वाह गर्न सकिने बताए। विशेष महाधिवेशनमा सहभागी नभएका नेताहरूलाई समान प्रतिस्पर्धाको वातावरण बनाउन पदाधिकारी र केन्द्रीय सदस्यको संख्या बढाइएको उनको भनाइ थियो।
महाधिवेशनपछि पनि पार्टीलाई एकताबद्ध बनाउने प्रयास जारी रहने थापाले बताए।
