काठमाडौं । नेपाल कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहालले सुनसरीमा विकसित पछिल्लो परिस्थितिलाई राजनीतिक संवाद र सहमतिमार्फत समाधान गर्नुपर्ने बताएका छन्। उनले संवेदनशील अवस्थामा राजनीतिक दल, सरकार र सबै सरोकारवाला पक्षले संयमता अपनाउँदै सामाजिक सद्भाव र आपसी विश्वास कायम राख्नुपर्नेमा जोड दिएका छन्।
बुधबार सिंहदरबारमा बसेको सर्वदलीय बैठकमा धारणा राख्दै दाहालले भूकम्प, बाढी–पहिरो तथा संविधान निर्माणजस्ता राष्ट्रिय चुनौतीका बेला राजनीतिक दलहरूले देखाएको एकता र सहकार्यको स्मरण गरे। अहिले पनि त्यही स्तरको राजनीतिक परिपक्वता, संवाद र जिम्मेवारीबोध आवश्यक रहेको उनको भनाइ थियो।
राष्ट्रिय महत्वका संवेदनशील विषयमा राष्ट्रिय स्वतन्त्र पार्टी नेतृत्वको सरकारले साझा समाधान खोज्न प्रभावकारी पहल गर्न नसकेको भन्दै दाहालले सरकारको भूमिकामाथि प्रश्न उठाए। यद्यपि, समसामयिक विषयमा छलफलका लागि सर्वदलीय बैठक आह्वान गरेको भन्दै राष्ट्रिय स्वतन्त्र पार्टीका सभापति रवि लामिछानेलाई धन्यवाद दिए।
दाहालले प्रधानमन्त्रीले तत्काल सर्वदलीय संवाद र सहमतिका लागि पहल गर्दै सबै राजनीतिक दललाई विश्वासमा लिनुपर्ने बताए। परिस्थितिलाई सहज बनाउन सरकार थप जिम्मेवार, सक्रिय र संवेदनशील बन्नुपर्नेमा पनि उनले जोड दिए।
संयमता अपनाउन आग्रह गर्दै दाहालले भने, “यो राजनीतिक तिक्तता बढाउने समय होइन, राष्ट्रिय जिम्मेवारी निर्वाह गर्ने समय हो। बल प्रयोग कुनै पनि समस्याको दीर्घकालीन समाधान हुन सक्दैन। संवाद, सहमति र राजनीतिक समझदारीबाटै परिस्थितिलाई सहज बनाउन सकिन्छ।”
सुनसरी घटनाको निष्पक्ष छानबिन गरी दोषीमाथि कानुनबमोजिम कारबाही गर्नुपर्ने माग गर्दै उनले सामाजिक सद्भाव, शान्ति र आपसी विश्वास कायम राख्न सबै राजनीतिक दल, सरकार र सरोकारवाला पक्ष एकताबद्ध हुनुपर्ने बताए।
दाहालले पार्टीले घटनाबारे आफ्नो आधिकारिक धारणा सार्वजनिक गरिसकेको र स्थानीय तहमा सामाजिक सद्भाव कायम राख्न पार्टी पंक्तिलाई आवश्यक निर्देशन दिइसकेको जानकारी पनि दिए। घटनास्थलमा बाह्य तत्वले वातावरण भड्काउने प्रयास गर्न सक्ने भन्दै उनले सबै पक्षलाई उच्च सतर्कता अपनाउन आग्रह गरे।
