काठमाडौं । वीरगन्जस्थित नारायणी अस्पतालका चिकित्सक तथा स्वास्थ्यकर्मीमाथि भएको साङ्घातिक आक्रमणको विरोधमा नेपाल चिकित्सक संघले मंगलबार देशभर आकस्मिकबाहेकका स्वास्थ्य सेवा बन्द गरेको छ। संघको आह्वानमा सरकारी तथा निजी अस्पतालमा नियमित ओपीडीसहित अधिकांश सेवा प्रभावित भएका छन्।
गत शनिबार नारायणी अस्पतालमा कार्यरत डा. प्रमोद रामसहित चिकित्सक तथा स्वास्थ्यकर्मीमाथि आक्रमण भएको थियो। घटनामा डा. रामको टाउकोमा गम्भीर चोट लागेको संघले जनाएको छ।
संघले घटनामा संलग्नलाई कानुनबमोजिम कारबाही गर्न माग गर्दै देशभरका स्वास्थ्य संस्थामा आकस्मिक सेवाबाहेकका सबै सेवा स्थगित गरेको जनाएको छ। संघले जिल्ला प्रशासन कार्यालय पर्सामा भएको छलफलका क्रममा प्रहरी परिचालन गरी आफ्ना केन्द्रीय कार्यकारिणी समिति सदस्य, नारायणी शाखाका अध्यक्षलगायत चिकित्सकमाथि दुर्व्यवहार भएको आरोप पनि लगाएको छ।
सेवा बन्दका कारण काठमाडौंसहित देशका विभिन्न अस्पतालमा उपचारका लागि पुगेका हजारौं बिरामी प्रभावित भएका छन्। स्तूपा सामुदायिक अस्पताल, एभरेस्ट हस्पिटल, भेनस हस्पिटललगायत स्वास्थ्य संस्थामा नियमित सेवा प्रभावित भएको छ।
नेपाल चिकित्सक संघले घटनामा संलग्नमाथि शीघ्र कारबाही नभए आन्दोलनका कार्यक्रम थप सशक्त बनाइने चेतावनी दिएको छ।
