काठमाडौँ । एसियाली विकास बैंक (एडिबी) का अध्यक्ष मासातो कान्डाले नेपालको आर्थिक विकास र रूपान्तरणका लागि बैंकको सहयोगलाई थप विस्तार गर्ने प्रतिबद्धता व्यक्त गरेका छन् ।
नेपाल भ्रमणका क्रममा प्रधानमन्त्री वालेन्द्र शाह (बालेन)सँग भएको भेटमा अध्यक्ष कान्डाले नेपाल र एडीबीबीचको लामो समयदेखिको सहकार्यलाई अझ प्रभावकारी बनाउँदै रोजगारी सिर्जना, लगानी प्रवर्द्धन र आर्थिक क्षमता अभिवृद्धिका क्षेत्रमा सहयोग बढाउने बताएका हुन् ।
एडिबीका अध्यक्षले नेपाल आर्थिक रूपान्तरणको महत्त्वपूर्ण चरणमा रहेको उल्लेख गर्दै थप सुदृढ र लचिलो अर्थतन्त्र निर्माणका लागि सहकार्य आवश्यक रहेको धारणा राखेका छन् । उनले एडिबी नेपालका लागि प्रमुख बहुपक्षीय विकास साझेदारका रूपमा निरन्तर सहयोग गर्दै आएको र आगामी दिनमा जनताले प्रत्यक्ष लाभ पाउने क्षेत्रमा केन्द्रित हुने बताएका छन् ।
अध्यक्ष कान्दाले सन् २०२९ सम्म नेपालका लागि एडिबीको थप सहयोग करिब २ अर्ब ४० करोड अमेरिकी डलर अर्थात् करिब ३ खर्ब ६५ अर्ब रुपैयाँ पुग्ने जानकारी दिएका छन् ।
यसैबीच, एडिबी अध्यक्षको भ्रमणका क्रममा नेपाल र उक्त बैंकबीच १६ करोड ५० लाख अमेरिकी डलर बराबरको सहयोग सम्झौतासमेत भएको छ । अर्थमन्त्री स्वर्णिम वाग्ले र एडिबी अध्यक्ष कान्दाबीचको भेटका अवसरमा उक्त सम्झौतामा हस्ताक्षर भएको हो ।
सम्झौताअन्तर्गत ११ करोड ५० लाख अमेरिकी डलर खानेपानी तथा ढल व्यवस्थापनसम्बन्धी परियोजनामा परिचालन गरिनेछ । उक्त परियोजनाले ८ लाख ५० हजारभन्दा बढी नागरिकलाई सुरक्षित र भरपर्दो खानेपानी तथा सरसफाइ सेवा उपलब्ध गराउने लक्ष्य राखेको एडिबीले जनाएको छ ।
त्यसैगरी, ५ करोड अमेरिकी डलर बराबरको नीतिगत ऋण सहयोग भन्सार प्रणाली सुधार, व्यापार लागत न्यूनीकरण, डिजिटल प्रक्रिया विस्तार तथा मुलुकको प्रतिस्पर्धात्मक क्षमता बढाउने क्षेत्रमा प्रयोग गरिने भएको छ ।
भ्रमणका क्रममा अध्यक्ष कान्डाले एडिबीको सहयोगमा सञ्चालन भइरहेका विभिन्न विकास परियोजनाको अवलोकन गरेका छन् । उनले काठमाडौँका दुई वटा विद्युत् सबस्टेसनको भर्चुअल उद्घाटनसमेत गरेका थिए । उक्त कार्यक्रममा ऊर्जा, जलस्रोत तथा सिँचाइमन्त्री बिराज भक्त श्रेष्ठ र नेपालका लागि नर्वेकी राजदूत डाग्नी म्योस सहभागी थिए ।
एडिबी अध्यक्षले भूकम्पपछिको पुनर्निर्माणअन्तर्गत एडिबीको सहयोगमा पुनर्निर्माण गरिएको विश्व निकेतन विद्यालयको समेत अवलोकन गरेका छन् । शिक्षामन्त्री सस्मित पोखरेलसँगै विद्यालय पुगेका उनले कृत्रिम बौद्धिकता (एआई) साक्षरता तथा शिक्षकको डिजिटल सीप विकाससम्बन्धी कार्यक्रमको उद्घाटन गरेका थिए ।
नेपाल भ्रमणका क्रममा अध्यक्ष कान्दाले अर्थमन्त्री वाग्लेसँगको भेटमा लगानी वातावरण सुधार, निजी क्षेत्रको भूमिका विस्तार, आर्थिक वृद्धि र उत्थानशीलता अभिवृद्धिका विषयमा छलफल गरेका छन् । उनले निजी क्षेत्रका प्रतिनिधिसँग समेत भेट गरी नेपालमा लगानीका सम्भावना र चुनौतीबारे जानकारी लिएको एडिबीले जनाएको छ ।
