काठमाडौं – नेपाल सरकारले देशभर सञ्चालनमा रहेका सट्टेबाजी सम्बन्धी एप तथा वेबसाइटहरू बन्द गर्ने निर्णय कार्यान्वयनमा ल्याएको छ।
सञ्चार तथा सूचना प्रविधि मन्त्रालयले जारी गरेको प्रेस विज्ञप्तिअनुसार मन्त्रिपरिषद्को बैठकबाट स्वीकृत शासकीय सुधारसम्बन्धी १०० कार्यसूचीमध्ये बुँदा नम्बर ४२ अनुसार सट्टेबाजी एप तथा वेबसाइट २४ घण्टाभित्र बन्द गर्ने निर्णय गरिएको थियो । सोही निर्णयअनुसार मन्त्रालयले मिति २०८२ चैत १५ गते मन्त्रीस्तरबाट नेपाल दूरसञ्चार प्राधिकरणलाई निर्देशन दिएको हो ।
प्राधिकरणले इन्टरनेट सेवा प्रदायकहरूसँग समन्वय गरी हाल पहिचान भएका सबै सट्टेबाजी एप तथा वेबसाइटहरू बन्द गरिसकेको जनाएको छ ।
मन्त्रालयका अनुसार सट्टेबाजीसम्बन्धी गतिविधि नेपालका विद्यमान कानुनविपरीत रहेको छ। मुलुकी अपराध संहिता, २०७४ को दफा १२५ (४) अनुसार सट्टेबाजी गर्नु वा गराउनु गैरकानुनी मानिन्छ। उक्त व्यवस्था उल्लङ्घन गरेमा सोही ऐनको दफा १२५ (६) बमोजिम कसूरमा प्रयोग भएको रकम जफत गरी एक वर्षसम्म कैद र १० हजार रुपैयाँसम्म जरिवाना हुने प्रावधान छ ।
त्यसैगरी, विज्ञापन (नियमन गर्ने) ऐन, २०६६ अनुसार पनि जुवा वा सट्टेबाजीसम्बन्धी विज्ञापन गर्न नपाइने व्यवस्था रहेको मन्त्रालयले स्पष्ट पारेको छ।
मन्त्रालयले सबैलाई कुनै पनि विद्युतीय माध्यमबाट सट्टेबाजी एप वा वेबसाइट सञ्चालन तथा प्रयोग नगर्न आग्रह गरेको छ। साथै, अनाधिकृत रूपमा यस्ता गतिविधि सञ्चालन वा प्रयोग गरेको पाइएमा प्रचलित कानुनअनुसार कडा कारबाही गरिने चेतावनी दिइएको छ ।
