काठमाडौँ । नवनियुक्त गृहमन्त्री सुधन गुरुङले सेवा प्रवाहलाई सहज बनाउँदै भ्रष्टाचारप्रति शून्य सहनशीलताको नीति अपनाउन निर्देशन दिएका छन् ।
गृह मन्त्रालयमा शुक्रवार(आज) पद बहालीपछि कर्मचारीलाई निर्देशन दिँदै उनले भ्रष्टाचारीमाथि कठोर निर्णय लिने उद्घोष गरेका छन् । “भ्रष्टाचारप्रति शून्य सहनशीलता हुन्छ, कसैले घुस माग्यो भने त्यसलाई त्यत्तिकै छाडिँदैन,” उनले भने ।
जनतालाई परिणाम दिने गरी काम गर्न मन्त्रालयको नेतृत्व सम्हालेको उल्लेख गर्दै गृहमन्त्री गुरुङले एकद्वार प्रणालीमार्फत शीघ्र सेवा प्रवाह गर्ने व्यवस्था मिलाउन निर्देशन दिएका छन् । कम बोल्ने र नतिजा देखाउनेमा आफू केन्द्रित हुने उनको उद्घोष छ ।
“सेवा प्रवाहलाई मुख्य प्राथमिकतामा राखिएको छ । १,२,३ वा क, ख, ग कोठा चाहर्नुपर्ने अवस्थाको अन्त्य हुनुपर्छ, सेवाग्राहीसँग कर्मचारी ठोकिनु नपरोस्, यसैबाट सुशासन ल्याउन सकिन्छ,” उनले भने ।
जेन जेडको जनादेश कार्यान्वयनका लागि मन्त्रिपरिषदबाट निर्णय भइसकेको उल्लेख गर्दै उनले त्यसलाई सबैले आत्मसात् गर्नुपर्ने बताए । सरकारका निर्णय कार्यान्वयन नगर्ने छुट कसैलाई नभएको उनको भनाइ छ ।
निर्देशनका क्रममा गृहमन्त्री गुरुङले अहिलेको परिवर्तन जेन जेड युवाको बलिदानबाट सम्भव भएको उल्लेख गर्दै सहिदहरूको सम्झनामा एक मिनेट मौन धारण गराएका थिए ।
मन्त्रालयमा उनलाई गृह सचिव राजकुमार श्रेष्ठ, नेपाल प्रहरीका महानिरीक्षक, सशस्त्र प्रहरी बल नेपालका महानिरीक्षक, राष्ट्रिय अनुसन्धान विभागका प्रमुख तथा मन्त्रालयका उच्चपदस्थ कर्मचारीले स्वागत गरेका थिए ।
