ऊर्जा जलस्रोत तथा सिँचाइमन्त्री वर्षमान पुनले नेपाल विद्युत् प्राधिकरणमा कार्यकारी निर्देशकको नियुक्ति छिट्टै हुने बताएका छन् ।
प्रेस सङ्गठन जिल्ला शाखाले आज रोल्पाको लिवाङमा आयोजना गरेको पत्रकार भेटघाट कार्यक्रममा उनले बहालवाला कार्यकारी निर्देशक कुलमान घिसिङको पदावधि यही भदौ २९ गतेसम्म रहेकाले त्यसअघि नै सरकारले नियुक्तिको प्रस्ताव मन्त्रिपरिषद्मा लैजाने बताए ।
कुलमानको पुनःनियुक्तिका विषयमा पत्रकारले सोधेको प्रश्नको जवाफ दिँदै मन्त्री पुनले कसलाई नियुक्ति गर्ने भन्ने विषयको अझै टुङ्गो नलागेको स्पष्ट पारे । “कुलमान घिसिङको विषयमा कोही सकारात्मक र कोही नकारात्मक रहेको भन्दै चलाइएको हल्लामा सत्यता छैन”, मन्त्री पुनले भने ।
पहिलो चार वर्षे कार्यकालमा लोडसेडिङ अन्त्य गरेर नेपाल विद्युत प्राधिकरणलाई नाफामा लैजान नेतृत्व गरेका घिसिङलाई पुनर्नियुक्ति दिन नागरिक तहबाटै व्यापक माग भइरहेको छ। केही व्यक्तिहरु भने कुलमान घिसिङ्गले नेपाल विद्युत प्राधिकरणमा एउटा जग बसालिसकेकाले अब उनलाई नेपाल एयरलाइन्समा लैजानुपर्ने माग समेत गरिरहेका छन् ।
घिसिङ आफैंले भने केही दिनअघि विज्ञप्तीमार्फत् हालका प्रधानमन्त्री ओली र मन्त्री पुन एवं उहाँहरु भन्दा पहिलेका प्रधानमन्त्री र ऊर्जामन्त्रीहरुको नेतृत्व र योजनाअनुसार आफुले काम गरेर परिणाम निकालेको बताएका थिए ।
